قسەکەرەو ئەنجوومەنوو ژەناو پارتوو یەکسانی و دیموکراسیی گەلا (دەم پارتی) خالیدە تورکئۆغلۆوە پەیوەس بە پەرسەو  ژەنا بیناو ناوەندی گردینوو پارتینە کۆنگرێوی ڕۆنامەوانییشا گێرت.  تورکئۆغلۆوە ئەوەڵوو قسەکاش بە سڵامکەردەی وەنەو مدرامانەکاو ئەدایاو شەممەی دەس پەنە کەرد و پەیاموو "کۆشیایشا کۆشیای ئێمەن" دا.

دماتەر تورکئۆغلۆ باسش کەرد کە قەرارەکاو دۆزو کۆبانێ نایاسایێنێ و واتش: "ئێمەی ژەنی بە قۆناغوو ئاسایبییەی حکومەتی فرە خاس ئاشنێنمێ. دەسەڵاتداری دماو تێکشیەیەکاش ورچنیەیە وێمانەکاو ٣١و ئازارینە، سیاسەتوو 'ئاساییکەردەیوە و نەرمکەردەی' پا سزێ دۆزوو کۆبانێنە وەراوەروو هامڕایاماوە بەرەش کەردە، جارێوی تەر وێش نیشانە داوە. حەروەختێو قەیرانێو ک بێ کایەوە باسوو ئاسایبییەی مکەرۆ. گەرەکشابێ گەلوو کوردی و دەسکەوتەکاو گەلوو کوردی و شۆڕشوو کۆبانێ کە بە سەرمەشقایەتیی ژەنا بەدسئامێنێ سزا بدانێ. پەوکای ڕا پینەیە نمەدەیمێ. پێسەو فیگەن یوکەسەکداغ واتش، 'قسێ ئاخیرە مدرامانکەرێ مکەرانێش'. پەوکای جارێوی تەر وەعدما پێسەو  ژەنا ئەوەخوای مکەرمێوە کە وەعدوو ژەنا مدرامان و گەورەکەردەی کۆشیاین. بە مدرامان و کۆشیای یۆترینی ئازاد مکەرمێن. پەی هامڕایە گیریایاما زیاتەر وێما ڕێکێ بوزمێ، کۆشیای و پەشتیوانیمان خاستەر مکەرمێ."

'دادپەروەری نییا'

تورکئۆغلۆ ئانەش دیاریی کەرد، کە ٢٢ ساڵێن تندی، فشار، دزی و داگیرکەردەی لاو دەسەڵاتداراوە مکریۆ و واتش: "بەڵێ چی وەڵاتەنە وەزارەتوو دادی هەن، بەڵام دادپەرەوەری نییا و ئانە کە هەن نادادپەرەوەرییا. ماوەو ٢٥ ساڵان سەروو بەڕێز ئۆجالانی گۆشەگیریێوە هەن و وەزیروو دادی مواچۆ 'گۆشەگیری نییا' وەراوەروو پاشێلکەردەی مافوو زیندانیکریایانە بێدەنگا. ئەدایێ ٧٠-٨٠ ساڵێن چون ئاشتییشا گەرەکارێ مگیریانێ و قسێوی دەموو وەزیریوە نامارێ، ئینەیچە بە ماناو ئەرێکەردەی پەی سیاسەتوو دەسەڵاتداری مێ نەک بەیاگەیاونای دادپەروەری. بە ماناو جەختکەردەیوەنە جە جەنگی. گەرەکشانە یاونای حەقیقەتی قۆرتاوی بکەرا. بەڕێز وەزیروو دادی چی داواو چەمپەنەکەوتەی ئەدایا قبووڵ نمەکەری. وەنەو چێشی متەرسدێ. بەڵێ مەتەرسدێ چونکوم ئەدێ، کە ئاشتییسا گەرەکا زەرەر نمەیاونانێ."