جە ئەرەیاۋناکەینە ئامان، کە جەژنەو زۋانی کوردی دژوو سیاسەتەکا سەرکوتی، بەدسئاردەیش زانابیەین، دژوو سیاسەتوو ئەسڕیەیۆ مدرامان و دژوو ئەقڵیەتی بێ یادەوەری کەردەی، ڕۊو خاوەندارییا جە ۋیر و یادەوەری گلێرگەی! جە ئەرەیاۋناکەینە ئانەیچ ئامان: "بەنامۍ کۆمیتەو پەروەردەی کەجەکەی جەژنەو زۋانی کوردی جە سەرەتانە جە رابەر ئاپۆی کە هیواو ئازاڎیی گەلەکەیماش یاونا بە ئاستوو ئەرەکۊشایۍ بێ هامتای و پەی ئانەی سڵش جە هیچ لەمپەر و ۋەربەسێوە نەکەردۆ، جە گەشمەرڎە قارەمانەکاما کە پەی بیەی، زۋان، بەها و ئازاڎیی گەلەکەیشا ۋێشا یاونا بە پلە و نەمری، حەرپاسە جە گەلە ۋێڕاگرەکەیما کە سەرەڕاو گرڎ جۆرە قەڎەغۍ، فشار، چەوەسنایۆ و کوشتەی دەسبەردارۍ زۋانەکەیشا نەبیۍ و جە ۋەرا ۋەروو نەیارانە چۆکشا نەڎارە، مبارەک مکەرمۍ."

جە ئەرەیاۋناکەینە ئاماژە پا واچاو رابەروو گەلوو کوردی عەبدوڵا ئۆجالانی کریان: "ئاستوو وەڵێوستەی زۋانی، ئاستوو وەڵێوستەی ژیۋاین. گلێرگێوە چنڎە ئاستوو زۋانی ئەڎاو ۋێش بەردەبۆ وەڵێوە، پا حەدەیچە ئاستوو ژیۋایش ئانڎە بەردەن وەڵێوە. حەرپاسە چنڎە زۋانش جە دەس دابۆ و کەوتەبۆ چێروو کاریگەری زۋانەکا تەریوە، پا حەدە ئەرەگیرکریان، تووشوو سەرکوتی و قڕکەردەی بیەنۆ. ئا گلێرگۍ ئینۍ چا ئاژەنە مەتاوا جە روو هوشیاری، ئەخلاقی و ستاتیکایوە ساحیب ژیۋایۍ ماناڎاری با و پېسە گلێرگێوە نەوەشی تا ئاستوو دلێنەشیەی ناچار بە ژیۋایۍ تراژیکی و مەرگەساتی با".

جە ئەرەیاۋناکەیچەنە ئی مژارۍ وزیێنۍ ڕووە: "ۋەروو ئا ڕاسیە زۋان ئشناسنامە و یادەوەری هامبەشوو گلێرگەکان. پارێزنای و وەڵۍ وستەی یادەوەری هامبەش و گلێرگەی، پەیوەس بە پارێزنای و وەڵۍ وستەی زۋانی ئەڎایی. ڕەفتێوە کە چنەشەنە نکۆڵی و قڕکەردەی بۆ، قەڎەغەکەردەی زۋانوو ئەڎێن. پېسە قەڎەغە، مەترسیڎار و جیاوازانە پێناسەکەردەی زۋانی کوردی، جە ئەساسەنە سیاسەتوو ناستەی بیەو کوردین. پێویسا ئێمەیچ جە دژوو ئا قڕکەردەیە جە ڕاو قسەکەردەی بە کوردی، بە نویستەی کوردی و بە رێکوستەبیەی ۋێڕاگری بکەرمۍ و کۊشیای خاوەنداری و بەرزکەردەیۆ ئاستوو زۋانی جە گرڎ وەختۍ زیاتەر بەرمۍ ڕاوە. چا خاڵێنە ئانڎەی کۊشیای جە دژوو سەرکوتی، جە دژوو ۋێتاونایۆی ڕووانە دلۍ ئەرەکۊشابیەینە ئەرکی بێ ئیلاو ئەولاو گرڎ کوردێوە بڕوامەند بە ئاینڎێوە ئازادیا.

مشۊم ئێمە جە یاڎش نەکەرمۍ؛ پەروەردە بە زۋانوو ئەڎۍ رەواتەرین مافا، پەی بەدەسئاردەی ئا مافیە جە گرڎوو کایەکا ژیۋاینە ۋۍ بەرێکوستەی و ڕاوەبەردەی چالاکیەکایچ هەم مافێوە رەوان کە مەکریۆ دەسبەردارش بیمۍ و هەمیچ پەنەوازیێوەن!

دەسنیشان کەردەی "راسی بیەیش نییا، زۋان بیەیش هەن. جە خودبیەی گەلێوەنە راسی نکۆڵی هورنەگیروو زۋانی وزۆ ۋەرووچەما. چا مەعنێنە زۋانی کوردی، راسی خودبیەو گەلوو کوردین. خاوەنداری جە زۋانی کە گەرەکشانە جە ڕاو گرڎ کەرەسێوە تنووتیژی و جەنگی تایبەت دلێنەبریۆ، پېسە هێزی، ئارۆیچەنە سەرەکیتەرین پەنەوازی بیەیما، بڕوابیەی بە سەروستەی کۊشیای و ۋەروودەم و تاریخیچەنە ئەرکوو سەروو شانامانە.

حەرپۊکەی پێویسا گەلەکەما جە هەر شۊنێوەنە مژیۋۆ قسەکەردەی و نویستەی بە کوردی پېسە چالاکی بە نەمری ئاستەیۆ زۋانی کوردی بوینۆ، جە گرڎ شۊنێنە پەی مسۆگەرکەردەی پەروەردەی بە زۋانی ئەڎایی و راماڵای ئاستەنگە یاساییەکا ۋەروودەم و بەکارئاوردەی زۋانی ئەڎایی ئەرەکۊشایۍ بەهێز و بێوچان بەرۆڕاوە و هەرگیز ڕا بە سیاسەتوو تاونایۆ ئەقڵیەتی تاک زۋانی نەڎۆ.

١٥و ئایاری جەژنەو زۋانی کوردی جە هەمان وەختەنە ٩٢ەمین ساڵیاڎوو ئەرەمەرزنای گۆڤاروو هاوارین، جە گەلەکەیما و گرڎوو گەلا تەری پیرۆز مکەرمۍ، جە کەسایەتی جەلادەت عەلی بەدرخانی و هەڤاڵاشەنە ئا کەسۍ بە رەنج و قوربانیدای زۋانی کوردیشا وەڵۍ وست و پارێزناشا، سڵامشا ئاراسە مکەرمۍ."