دماو کېڵۍ بەینوو هۆڵەندای و تورکیای گروپێوە فاشیستۍ تورکی هەوڵشا دا هرووژم بکەرا سەرو ناوەڼو جەمۊ دیموکراتیکی کورڎی (نەجەدەکە)ی لەندەنەنە. گەنجاو کورڎی دژو هرووژمەکەی دەسشا بە ۋێپارێزنای کەرد. جە ڕوە دایەکەنە دۋۍ گەنجۍ کوردۍ گیریۍ.
تورکە فاشیستەکۍ جە مەحاڵەو هارینگی لەندەنینە کە ناوەڼو جەمەو دیموکراتیکی کوردی نەجەدەکەیش ئینا چنە و پېسە گەڕەکەو کوردەکا ئشناسیان، دماو کێڵۍ بەینوو هۆڵەندا- تورکیای هەوڵشا دا هرووژمېوە گێرەشێوێنانە ئەنجام بڎا. دماو دۆڕیای تورکیای جە کێڵەکېنە بە ئەنجاموو دووۍ گۆڵا ۋەرا ۋەر بە گۆڵێوی نەژاڎپەرسە تورکەکۍ بە ئاڵاو تورکیای و هێماو وەرگی کە هێمێوە فاشیستیەنە گەرەکشا بۍ بلانە دلۍ مەحاڵەو هارینی. نەژاڎپەرس و فاشیستەکۍ لوۍ دلۍ جاڎەو گرین لانی کە نەجەدەکە بارەگاش ئینا چا جاڎەنە. گەنجاو کوردی کە چا شۊنېنە دژوو ئاژاوەگێڵنی چەمەڕاکریاو فاشیستەکا ئشێکگیرینە بێنۍ، ناڕەزایەی تنشا نیشانەدا. پا مەڵامەتۆ فاشیستەکۍ بڕەمۍ و پۆلیسوو بەریتانیای جیای ئانەی ۋەرا ۋەر بە ئاژاوەگېڵنی نەژاڎپەرسەکا مردۆوە، هۊرئێست بە گازی بیبەری و هەڵسمچ هرووژمش کەرد سەرو کوردەکا.
جە ۋەرا ۋەرەنە کوردەکۍ بە واتەیۆ دروشمۍ جە دژوو فاشیزمی، دەسشا بە چالاکی شەرمەزارکەردەی کەرد و بەسەڎان کورڎەسانیۍ جە مەحاڵەو گرین لانینە دژوو هەڵوێسوو پۆلیسی بەشداریشا جە چالاکی ئەرەنیشتەینە کەرد.
دماو ئانەی پۆلیس دووۍ گەنجۍ کوردیش دەسبەسەرۍ کەردۍ، چالاکاو کوردی بەرەو بنکەو پۆلیسوو وودگرینی جە مەحاڵەکېنە ڕاپیمایشا کەرد و داواو ئازاڎکەردەی ئا دووە گەنجەیشا کەرد. یۆ جە گیریایا ئازاڎکریا و قەرارا گەنجەکەی تەریچ دماو هۊرگېرتەی واچەی چنەش ئازاڎ بکریۆ.
ڕاوەبەرا ناوەڼو جەمەو دیموکراتیکی کوردی ئەرەیاۋناشا، کە گروپە فاشیستە نەژاڎپەرسەکۍ بە هاندای باڵیۆزخانەو تورکی جە لەندەنەنە و جەمە نەژاڎپەرسەکا سەر بە حکومەتی فاشیستی ئاکەپە-مەهەپەی دەسشا بە ئاژاوەگێڵنی کەردەن.
