هونەرمەنڎە و شۆڕشگێڵنەو کوردی هۆزان مزگینە جە ٣٢ەمین ساڵیاڎوو گەشمەرڎەبیەیشەنە جە ناوەنڎوو کولتوری و هونەری کەمپوو پەنابەرا گەشمەرڎە رۆستەم جودی (مەخمور)ینە یاڎش کریاوە.

ناوەنڎوو کولتوری بە ۋێنەکاو گەشمەرڎا کولتور و هونەری ڕازیانۆ. وەڵۍ دەسپنەکەردەو یاڎەکەینە، جە کەسایەتی گەشمەرڎە مزگینۍ و گرڎوو گەشمەرڎا کولتور و هونەرینە بە دەیەقێوە بێدەنگی رێز جە گرڎوو گەشمەرڎا جمیەروو ئازاڎیی کوردسانی گیریا. دماو حورمەت گێرتەی سەبارەڎ بە هونەر و کۊشیای گەشمەرڎە هۆزان مزگینۍ، ئەندامەو ستێرا زێڕینی هەلەنا بابات قسێش کەردۍ.

هەلەنا جە سەرەتاو قسەکاشەنە واتش، جە کەسایەتی گەشمەرڎۍ هۆزان مزگینێنە گرڎوو گەشمەرڎا کولتور و هونەریش وە یاڎ ئاردێوە و واتش: پېسە مزانیۆ مانگەو ئایاری مانگەو گەشمەرڎانە، مانگەو قارەمانانە. جە هەمان وەختەنە مانگەو گەشمەرڎاو کولتور و هونەرینە کە هەم بە هونەروو ۋێشا و هەمیچ جە ڕاو قارەمانیشاوە ژیۋایشا جە دەسدان. یاڎوو گرڎوو ئا گەشمەرڎا بەرزڕاگێرمۍ. هەڤاڵ مزگینە هەم بە شێوەی قارەمانی و هەمیچ بە شێوەی هونەری دلۍ ریزەکاو گەریلاینە رەنج و زەحمەتش کێشت. یاڎوو رەنج و مانیاییەکاش جەبواروو کولتورینە مکەرمېوە و سەرەو ۋێما ۋەرا ۋەر بە یاڎوو ئاڎۍ منامنمێرە. گەشمەرڎە دەڤریم-ە و فرەو گەشمەرڎا تەری پېسە ئاڎیشا چی ڕێنە گیانشا بەخشا. وەختۍ سەرنج مڎەیمۍ جە قەڎیمۆ تا ئیساتۍ بەسەڎان قارەمانۍ و گەنجۍ کوردی سەروو ئا رێبازیە گیانشا فیدا کەردەن. بەردەوام سەروو رێبازوو ئا گەشمەرڎاوە بیمۍ".

دماو قسەکا بەڵگەفیلمێوە سەروو ژیۋای و هونەری گەشمەرڎە مزگینۍ نمایش کریا. دماتەر گروپوو تەڤچاندی و ستێرا زێرینی گۆرانیێشا پێشکەش کەردۍ.