بە بەشداری ئەنداما و ۋەرپەرسا رێکوزیا سیاسی و کۆمەڵایەتیەکا پېسە نوێنەرا گەلاو رووسی، گورجی، یونانی، لەزگین، گەلاو سیبریای و ۋەرکەوتوو رووسیای، حەرپاسە خۆنکارا، تاریخ نۋیسا، ئەوەکۊڵیەرا، هونەرمەنڎا، رێکوزیاکا ژەنا و ئەنداماو کۆنگرەی نەتەوەیی کوردسانی (کەنەکە) مۆسکۆو پایتەختوو رووسیاینە مەراسیمێوە مبارەکبایی سازکریا.

مەراسیمەکە بە دەیەقێوە بێدەنگی پەی رێزۋنەگێرتەی جە یاڎوو گەشمەرڎا کوردسانی دەسشپنەکەرد. دماتەر بەڵگەفیلمێوە سەروو تاریخوو ئەرەمەرزناو کەنەکەی نمایش کریا. هامسەرۆکوو ئۆتۆنۆمی کولتوری-نەتەوەیی فیدراڵی کوردا جە روسیانە فەرهاد پاتیەڤ وتارەو سەرەتایش پێشکەش کەردە و خێرئامای مێماناش کەرد. پاتیەڤ حەرپاسە باسش جە ئامانجەکاو ئەرەمەرزناو کۆنگرەو نەتەوەیی کوردسانی کەرد.

دماتەر، مێمانەکۍ قسێشا کەردۍ و جە قسەکاشانە ئاماژەشا بە نادادپەروەری ۋەرا ۋەر بە گەلوو کوردی و رابەروو گەلو کوردی عەبدووڵا ئۆجالانی کەرد و واتشا پەی گرڎ جۆرە پەشتیوانیێوە ئاماڎێنۍ.