پارێزنەر جەمال دەمیر قسۍ وەزارەتوو دادیش هۊرسنگنا کە ماوۍ چێوەڵتەر واتەبێش 'هیچ ڕاگیریێوە جە چەمپنەکەوتەی ئۆجالانی چنی بنەیانەی و پارێزنەراش بیەیش نیا' و ئاماژەش پانەی دا گۆشەگیری جە فرەو ڕووانگاوە بە ۋەرفراوانی بەردەواما.

دەمیر ئاماژەش پانەی دا هیچ هەنگامېوە یاسایەی پەی لابەردەی و لاوازکەردەی گۆشەگیری نە نریان و ئینەشە دژ بە یاسۍ بەنامۍ کەرد ۋەرا ۋەر بە مافوو مرۆڤی و یاسای گەردوونینە. دەمیر سەرنجش وست سەروو بێ هەڵوێسی ڕێکوزیا میان نەتەوەییەکا سەربارەت بە گۆشەگیری و واتش: "بەین بەین سی پی تی سەردای ئیمراڵی مکەرۆ، بەڵام ئێیچ بیەن بە بەشێوە جە گۆشەگیری. هیچ باوەڕیۍ بە سی پی تی نەمەنەن و دماو سەروەداکاش هیچ ئەرەیاۋنێوە مەڎۆ. بنەیانەو و پارێزنەرا بەڕێز ئۆجالانی داواو چەمپنەکەوتەی پێشکەش مکەرا بەڵام بە هیچ جۊرۍ ڕا بە چەمپنەکەوتەی مەڎریۆ. پۊکەی جە ئیمراڵینە یاسێوە فرەو ڕاوەبەری بیەیش هەن."

'بەیاننامەکەو وەزارەتوو دادی پەنەوازیش بە ڕۊشنکەردەیۆ هەن'

دەمیر ئاماژەش پانەی دا داوکاری گرڎیی  کۆماری بۆرسای بە ئاماژەدای بە 'سزاو دیسیپلینی' جوابوو داواکاری پارێزنەرا نوسینەگەو یاسایی سەڎەی مڎۆوە، کەچی وەزارەتوو دادی بەیاننامێوە نامۆش دا و ماچۆ 'هیچ ئاستەنگیێوە ۋەرا ۋەر بە چەمپنەکەوتەی بیەیش نیا' ئی قسۍ پەنەوازش بە ڕۊشنکەردەیۆ هەن. بەڕیز ئۆجالان ساڵانێوە فرەن ئینا گۆشەگیرینە. مەڵامەتوو ئی گۆشەگیرییەیچە حکومەتا. سەرەڕاو ئینەیچ بەیاننامەکەو وەزارەتوو دادی جە تەرەفی یاسای و سیاسیوە ڕۊشنکەردەیۆش پەی مەکریۆ. ئەرەمەرزیاکۍ حکومەتی یۆترینی پەشڕاس مەکەراوە و دروۍ مکەرا. پێویسا ئیتر بەیا سەروو خەتەو دیموکراسی و ئاشتی.

گۆشەگیری ڕەفتێوە دژ بە دیموکراسیا. دژ بە یاساو یۆبیەی ئەوروپایا کە تورکیایچ تەرەفێوە دلۍ ئا پەیماننامەینە. کەچی بە جەختکەردەیۆ بەردەوامی مڎۆ بە گۆشەگیری. ئامانجوو گۆشەگیری بێدەنگکەردەو گەلوو کوردین کە هیچ وەختۍ پێکنمۍ. پێویسا گۆشەگیری دمایش بۍ هیچ ڕاگیریێوە ۋەروودەم و دەنگی ئاشتی و دیموکراسینە نەمەنۆوە. گۆشەگیری تاوانەنە دژوو مرۆڤایەتی، نیا ئیسفاڎەو کەسینە، دەردەو دەسەڵاتداری مەوەرۆ. پۊکەی پێویسا گۆشەگیری کە جە دژوو بنەماکا مافوو مرۆڤین بە تەمامی لابریۆ."