کۆمسیۆنی باڵاو سەربەوێ ورچنیەیەکانی عێراقی ماوێوە فرەن گەرەکشا ورچنیەی هەرێموو کوردستانی ببەرۆ ڕاوە. کۆمسیۆنوو ورچنیەیەکا تا حەفتەی وەڵینیچ بە پاو پڕۆسەو ورچنیەی و تا ورچنیەیەکە وادەی دیاریکریانە بکریۆ ئامادەکاری کەرێ. جگە جە پەدەکەی، پارتە سیاسییەکاو هەرێموو کوردستانیچ بە پاو هەمان پڕۆسەی ئینێ ئامادەکاریینە.

ئیساتێوە دیارا ئی ورچنیەیە هەرێمی سەروو خاکوو پانیشتوو کوردستانی و  عێراقیوە بە گردیوەی هامسەنگی مفاڕۆ. پێسە وەڵینا واتەن 'مانگەشەوە سەروێرەگاوە دیارەنە'. ئا ورچنیەیە چە وەنەکەوتە و ئەنجامێوەش دماوە بۆ، ئیساتێوە ورسەنگنای پەیش گێرا یاگێنە نەبۆ. چونکوم هەڵای فرە زووا. بەڵام ئانە کە دیارا، بە نزیکەیی سەرجەم پارت و لایەنە سیاسییەکا بە پاو وادەی دیاریکریای ئینا ئامادەکاریینە، بەڵام ئاخۆ چی پەدەکە دەسش بە ئامادەکاری نەکەردەن؟

تا ئیساتێ ورچنیەێوی دیموکراتیک هەرێموو کوردستانینە نەکریان

ماوەو زیاتەر جە ٢٠ ساڵان سەرتاسەروو خاکوو عێراقینە و بەتایبەتی  پانیشتوو کوردستانینە ورچنیەیێوی ئارام، پارێزیا و دیموکراتیک نەکریان. متاویۆ بوچیۆ بۆنەو هجوومەکا و داگیرکەریی داعشیوە جە ساڵا ویەردەینە ئا بوارە دیموکراتیکە نەمەنەبێ و ئی پەیلوایە تا ڕاددێوە مایێ یاواینەینە. بەڵام ماوەو چند ساڵان عێراق و پانیشتوو کوردستانینە تەرسی بە گردیوە ئارانە نەمەنێنە، لاو حکومەتوو هەرێمیچۆ جگە جە هجوومە داگیرکەرییەکاو دەوڵەتوو تورکی هیچ تەرسێوە وەرەچەمەی تەرە نییەنە. بەڵام وەختێو ئینسان جە سیاسەتەکاو حکومەتوو هەرێموو کوردستانینە ورد بۆوە، پێسەنە ئانەیە شەو و ڕۆ تەرسی سەروو خاکوو پانیشتوو کوردستانیوە هەنە و ئا گرژی و ئاڵۆزییەینە ڕا نمەدۆ ورچنیەیێوی ئارام و پارێزیا بلۆ ڕاوە.

گجیی خیانەتوو پەدەکەی یاگێ پینە و پەڕۆی تەری نمەبۆوە

وەختێ خاس ورد مبیوە و موینی، ئانە چا ئاڵۆزی و قەیرانانە تەنیا خاکوو پانیشتی نییا. ئاردەی حەر جۆرە داگیرکەریێوە پەی سەروو خاکوو پانیشتوو کوردستانی پلانەو پەدەکەینە. جە پەرەپەنەدای بە گرد جۆرێو نۆکەرایەتی و سیخوڕیینە کەس شانە وەنەو شانەو پەدەکەی نمەدۆ. یانێ ئانە زەمینە پەی ئا ئاڵۆزی و قەیرانا ساز مکەرۆ خودوو پەدەکەیا. پەدەکە ئیتر نمەتاوۆنێ گجیی سیاسەتی خیانەتکارانەو وێش پینە بکەرۆ! گجییە چەپەڵە خیانەتکارانەکاش یاگێوە پینە مکەرۆ، بەڵام یاگێوە تەرۆ مدڕیۆ و ئیتر یۆ نمەگێرۆوە.  پەدەکە گەرەکشا ورچنیەی بازۆوە و دماش وزۆ. ئینەیچ بێ سەبەب نییا.

گەلوو پانیشتی گەرەکشا دمایی بە باڵادەسیی بنەیانەو بارزانی بارۆ

گلێرگەو پانیشتی ئیتر پێسەو ویس ساڵا چیوەڵتەری نیا. ئیتر ئادێچ دیشا بە نامێ ئازادی و سەربەوێیی پانیشتوو کوردستانیوە نمەکریۆ بنەیانە و سوڵتەو وێش قەوەت بکەرۆ. گەلوو پانیشتی هەستش پا ڕاسییە کەردەن و گەرەکشا دمایی پا سیستموو بنەیانەییە یانەو بارزانی بارۆ. حەرچندە پەدەکە فێڵێ و تەڵەکێش با، چندە خەڵەتنای و ساختەکاری بۆ، ئیتر نمەتاوۆنێ هەرێموو کوردستانینە ورچنیەیێوی دیموکراسیینە سەرکەوتەی بەدەس بارۆ. پەدەکە وەروو ئانەیە ئا ڕاسییە موینۆ، پەنا بە گردوو  چەشنە ساختەکارییێوە مبەرۆ.  

دزەکە گیریان و نمازۆ ڕەمۆ!

وەراوەروو بێدەرەتانی و شپرزەیی پەدەکەی و بنەیانەو بارزانیوە، هامپەیمانی و یەکڕیزیی گەلاو پانیشتی چندە قەوەت بۆ و چندە زوو سەربگێرۆ، شکس و هەرەسئاردەی پەدەکەی و سەرکەوتەی گەلوو پانیشتوو کوردستانی ئاندە زووتر مسۆگەر مبۆنێ. پێویسا کۆمسیۆنی باڵاو سەربەوێی ورچنیەیەکاو عێراقیچ گۆش پا  فشاراو پەدەکەی پەی دماوستەی ورچنیەی نمەدۆ. بەڵام ئەگەر ڕێککەوتەی شاریاوە و چەپەڵیچ بۆ، پارتە سیاسییەکێ و ڕێکوزیا دیموکراتییەکاو پانیشتوو کوردستانینە ناچارێ نیەنێ بلا چێروو باریشەوە و متاوا یاگەدارێ و ئەڵترناتیڤێ وێشا ساز بکەرا. پەدەکە مزانۆ بەدڵنیاییەوە شکس مارۆ و دۆڕنۆش. بفڕۆیچ دمایچش وزۆ، ئاخرۆ حەر مەڕیۆ و شکس مارۆ. ئی جارە دزەکە گیریان  ونمازمێ ڕەمۆ!