کۆمیتەو پەیوەندیەکا بەروو پەکەکەی ئەرەیاۋناش، پەدەکە و بنەیانەو بارزانی خیانەتوو ۋێشا یاۋنان بە ئاژێوە بەرزتەر و ئا هێزۍ هامکاری دەوڵەتوو تورکی مەکەرا مکەراشا ئامانج. پەکەکە دژوو هامکارییەکاو پەدەکەی چنی دەوڵەتوو تورکی بانگەوازێوەش ئەرەیاۋنا.
ئەرەیاۋناکەوکۆمیتەو پەیوەندییەکا جبەروو پەکەکەی پی جۆرەنە:
جمیەرە گەورەکۍ و رابەرە بە پرەنسیپەکۍ، بە شێوەو ژیۋای و کۊشیای ۋێشا، جمیەرە گولانۍ و سەرکردە گولانەکێچ بە بێ پرەنسیپی و خیانەتەکاشا ملانە تاریخۆ.
جە جەنگوو ئازاڎیینە کە گەریلاکاو ئازاڎیی کوردسانی بە گیانبازی و قارەمانیەتی بەراش ڕاوە، دەسەڵاتوو پەدەکەی دژوو گەریلای چنی سوپاو تورکی و میتی کار مکەرا. جە هەولێرەنە ناوەنڎوو هەماهەنگی هامبەشی جە بەینوو سوپاو تورکی و پێشمەرگەکانە؛ جە بەینوو میتی و دەزگاو پارێزناینە ژوور و هامبەشیکەردەی زانیاری هەواڵگری ئەرەمەرزیان. وەزیروو جبەروو دەوڵەتوو تورکی هاکان فیدان فرەو وەختی ۋەروودەم و کامێرەینە ئا هامکارییەشە ئاشکراکەردەن. جە ماڵپەڕەکا سەرۆکایەتی فەرماندەیی گرڎین و وەزارەتوو جبەروو تورکینە خەریتەو بنکە و بارەگا سەروازیەکا تورکی کە بە هامکاری پەدەکەی بنیاڎنریێنۍ بە ئاشکرا وەڵۍ کریێنۍ.
ڕاوەبەرایەتی پەدەکەی و بنەیانەو بارزانی خیانەتشا یاۋنان بە ئاستێوە بەرزتەر
پەدەکە و بنەیانەو بارزانی عال مزانا کە هامکاری چنی دەوڵەتوو تورکی، چنی سوپاو تورکی و میتی بەماناو هامکارین چنی دوژمنی، دلۍ گەلیچەنە ئانە بە واتەی خیانەتی وەسف مکریۆ. پەی ئانەی بتاوۆ چا پەیوەندییە شووم و نەفرەت ۋنەکریانە بەتەنیا نەبۆ، هامکاریکەردەی چنی دەوڵەتوو تورکی سەروو حکومەتوو بەغڎای و ڕاوەبەرایەتی یەنەکەیچەرە مسەپنۆ، پەی ئانەیچ چنی دەسەڵاتداری ئەردۆغانی دیپلۆماسی هامبەش بەرۆڕاوە. سەردانیەکۍ هاکان فیدانی، ئیبراهیم کاڵنی و تەیب ئەردۆغانی پەی بەغڎای و هەولێری بەشێوەنۍ چا هەرمانۍ.
ڕاوەبەرایەتی پەدەکەی و بنەیانەو بارزانی جە ۋەرا ۋەروو دەوڵەتوو تورکی و هجوومەکاش پەی سەروو پانیشتوو کوردسانی تەنانەت هەڵوێسێوە گولانەیچ نیشانە مەڎا و بە کەلیمێوە قسۍ مەکەرا، ئا خیانەتەی کە کەردەنش بە پیشە، یاونانش بە ئاستێوە بەرزتەر. ئا هێزۍ پێسە ئاڎیی خیانەت مەکەرا و مەبانۍ بە داردەس و هامکارۍ دەوڵەتوو تورکی، مکەرۆشا ئامانجوو تورکیای.
رۆنامەو خەبات و پەدەکەی جە ژمارە ١٤و ئایارو ۋێشەنە بە مانشێتوو 'پەکەکە سلێمانینە هێزی چەکڎار وەش مکەرۆ و کیانۆشا پەی قەندیلی و ۋەرنیشتی' شاروو سلێمانی و ئیدارەو شارەکەیش کەردەن بە ئامانجوو دەوڵەتوو تورکی. پەدەکە بە وەڵاو کەردەیۆ چێوی چانەی تورکیای هانی مڎۆ هجووم بکەرۆ سەروو سلێمانی. پەدەکە کە وەڵتەر خیانەتوو ٣١و ئابوو ١٩٩٦ی کەرد و چنی دەبابەکا سەدامی لووا دلۍ هەولێری، ئیساتێچ جە ڕاو دەوڵەتوو تورکی ئەرەگیریوە هەڕەشۍ جە گەلی و ڕاوەبەری سلێمانی مکەرۆ. پەدەکە، بنەیانەو بارزانی و رۆنامەو خەباتی عال مزانا کە نە رێکوستەیۍ پەکەکەی جە سلێمانینە هەن، نە هێزێوە سەروازی چانە هەن. ئینە دروێوە گەورێنە، بە مەبەس کریێنە، دروێوەنە ئامانجێش ئینا پەشتیۆ.
خیانەت جە ۋیر مەکریۆ و پەرسایشۆ چنی مکریۆ
عال و راسی و حەقەتینە چێشا؟
پەکەکە و گەریلاکاو ئازاڎیی کوردسانی جە ۋەرا ۋەروو هجوومەکا دوژمنینە پەی پارێزنای کوردسانی گرڎ وەختۍ و جە گرڎ شۊنێنە ئینۍ خزمەتوو کوردسانی و مرۆڤایەتینە.
پېسە ساڵەو ٢٠١٤، ئا وەختەی چەتەکۍ داعشی هجوومشا کەرد سەروو هەولێری، کەرکوک، مەخمور و شەنگالی، سەروو داواو هامکاری مەسعود بارزانی پێسە رووبارێوە جە کەشەکاوە خرۊشیۍ. تاریخ حەرپاسە خیانەتیچ تۆمار مکەرۆ. بەڵام مشۊم جە یاڎ نەکریۆ کە وەخت سەروو خیانەتیرە مە ۋییەرۊنە، خیانەت جە یاڎ مەکریۆ و زوو یان دێر ۋنەپەرسایۊش چنی مکریۆ.
جە پاسە وەختێوەنە کە گەلوو کوردی جە چوار پارچەو کوردسانی بە هەمان رۆح و هەستۆ کۊشیای ئازاڎیی بەرۊڕاوە، ڕاوەبەرایەتی پەدەکە و بنەیانەو بارزانی چنی دوژمنا گەلوو کوردی یۆ گێرا، خیانەتشا پەی ۋێشا کەردەن بە پیشە و پاگیری سەروو خیانەتی مکەرا. بارزانییەکۍ کە جە هۊرچنیەکا سەرنیشتوو کوردسانینە پەی پاڵپەشتی بەشداریشا جە هەڵمەتەو بانگەشەو ئاکەپەینە کەردەبۍ، پەشتیوانیشا جە بلۆکەو ئاکەپە-مەهەپە-هوداپارینە کەردەبۍ کە جە قڕکەردەی کوردانە هامبەشۍ تاوانێنۍ. جیای ئانەی جە ۋەرنیشتەنە پاڵ و هێزەکاو ۋێپارێزنای و ۋێڕاوەبەرینە مردا، پەشتیوانی جە دەوڵەتوو تورکی و چەتەکا داعشی مکەرا. جە پانیشتوو کوردسانینە جیای ئانەی جە ۋەرا ۋەروو هجوومەکا ڕووانە و ئەرەگیری دەوڵەتوو تورکینە مرداوە، ۋەرا ۋەر بە گەریلاکاو ئازاڎیی مرداوە کە دژوو ئا هجووما کۆشیانە.
ئاژەی ئۆبژەکتیف، راسی سەروازی و سیاسی و حەقەتینە ئینەنە. حەرپۊکەی ئا لکۍ کە مشۊم سەرەتا کریۆوە ئی لکێنە. نەوینای ئا هەڕەشۍ و خراپەکاریە، گولانەکەردەیۆ خیانەتی، مامەڵەی سست جە ۋەرا ۋەروو هامکاری چنی دوژمنی بە ماناو پەشتیوانیین جە خیانەتوو پەدەکەی و بارزانیەکا. حەرپۊکەی مشۊم کوردسانیا وڵاتپاڕێزنا، حزب، رێکوزیا، رۆشنۋیرا، نویسەرا و هونەرمەنڎا جە ۋەرا ۋەروو هامکاری و داردەسەیی پەدەکەینە پەی دەوڵەتوو تورکی و خیانەتەکەیشەنە مرداوە و نازا ئا خیانەتە پەرەش پنە بڎریۆ".
