پەکەکە بی بە ملۋێنان کەسۍ
گەریلاکاو هەپەگەی و یەژا ستاری یاڎوو ٤٥ ساڵەو ئەرەمەرزناو پەکەکەیشا مبارەک کەرڎ و ئەرەیاۋناشا، پەکەکە کە جە لایەن و ڕابەروو گەلوو کوردی عەبدوڵا ئۆجەلانیوە ئەرەمەرزیا و ئارۆ یاوان بە ملۋېنان کەسۍ.
پەکەکە جە ئەرەمەرزنایشۆ مۆرەو ۋێش سەروو فرێوە جە سەرکەوتەکاش دان. جە ۋەران ۋەریچەنە قارەمانۍ فرۍ گیان و وېشا بەخت کەرد و بەدیلێوە قورسشادا. ئارۆ جە کەشە سەربەرزەکا کوردسانیەنە مدرامانۍ گۆرە دژوو هجومەکا دەوڵەتوو تورکی ملۆڕاوە. گەریلاکاو هەپەگەی عەگید سەرهەڵدان، هێرش کۆچەر و گەریلاکاو یەژا ستاری بۆنەو ٤٥ ساڵەو ئەرەمەرزناو پەکەکەیۆ قسېشا کەرڎۍ.
گەریلا عەگید سەرهۊردای و یاڎوو ٤٥ ساڵەو ئەرەمەرزناو پەکەکەیش مبارەک کەرڎ و ئەرەیاۋناش:"پەکەکە بە گروپێوە دەسش پنەکەرڎ، بەڵام دماتەر بی بە ملۋېنان کەسۍ، وەڵۍ گرڎ چېوێنە ئەرەمەرزناو ئارتەش و ژەنا، دەسکۊتی فرەش وەشکەرڎ، ئینۍ گرڎ، جە سایەو کۊشیای ڕابەر ئاپۆی و گەشمەرڎاوە بۍ، بە ئەرەمەرزناو پەکەکەی، بیرۆکە و فەلسەفەو ڕابەر ئاپۆی گرڎوو جەهانیرە وەڵابیۆ، گەلوو کوردی ۋېش پارېزنا، ڕابەر ئاپۆ واتش:" تا ئی گەلە ئازاڎ بۆ ئێمە بەردەوامېنمۍ جە کۊشیایما. دماو ئانەی کۊشیای ئانڎە گەورە بی، دوژمن ڕابەرایەتیماش گێرت. ڕابەر ئاپۆ پا مەڵامەتۆ گۆشەگیرا، ئێمە ئامانجما ئازاڎیی گەلوو کوردی و ڕابەر ئاپۆیا."
حەرپاسە گەریلا شۆڕش ئەرەیاۋناش ئەرەمەرزناو پەکەکەی پۍ گەلوو کوردی مەعنېوە فرێش بیېنە و واتش:"پارتەکەما بی بە پارتوو ژیۋایۊ گەلوو کوردی، جە گروپێوە دەسش پنەکەرڎ و هەزاران قارەمانۍ پېسە زیلانۍ و عەگیدیش خوڵقنۍ" پەکەکە بە حۊڵوو ڕابەر ئاپۆی و گەشمەرڎا یاوان پی ئاستیە، وە زیاتەریچ وەڵۍ گنۆ، ئیسە جەنگ جە هەرێمەکاو پارېزنای مێدیاینە بەردەواما، مدرامانوو گەریلای چی جەنگەنە سەرکۊتەیا، ئێمە پېسە گەریلاکاو یەژا ستاری جە بەرزتەرین ئاستەنە مدرامان کەرمۍ و سەرۍ گنمۍ. هەڤاڵە گەشمەرڎە قارەمانەکېما بە کۊشیایشا بیۍ بە ڕەمزوو خەتەو مدرامانوو گردیما. ئێمەیچ وەرپرسیاری ۋېما تا سەرکۊتەی جابەجێ کەرمۍ."
هێرش کۆچەر ئەرەیاۋناش پەکەکە جە هەلومەرجێوە قورسەنە دروس بی و واتش:"پەکەکە بە کۊشیای ڕابەر ئاپۆی و هەڤاڵاش پێکئامان، جە وەختېنە کە هیچ دەرفەتێوە نەمەنەن پێکئامان و ئارۊیچ یاوان بە هەزاران جەنگەوانۍ و ملۋێنان کۊششکارۍ. هەڤاڵاو پەکەکەی کە جە هەلومەرجی سەختەنە سەرکۊتەی گۊرەشا بەدەسئارڎ، بیۍ بە هیواو گەلوو کوردی و گرڎوو گەلا، هەڤاڵەکېما جە هەرێموو پارېزنای مێدیاینە جە تونێلەکا جەنگینە مدرامانېوە گۊرە دژوو هجومەکا دەوڵەتوو تورکی بەراڕاوە. ئی مدرامانەو گەریلاکاو ئازاڎیی کوردسانی سەرگنۆ، ئێمە خۊتانکەرڎةی جە میراتوو مدرامانوو گەشمەرڎاما کەرمۍ و ئازاڎیی جەستەیی ڕابەر ئاپۆی مسۆگەر کەرمۍ."
