پەی پێکئامایەکا هەرێمی پەنج کورسیۍ پەرلەمانی دیاریکریۍ
واتەواچەو کۆمسیۆنوو باڵاو عێراقی جومانە غەلاییە ئاماژەش پانەی کەرد جە هەرێموو کورسانی فیدراڵینە پەنج کورسیۍ پەرلەمانوو کوردسانی پەی پێکئامایەکا تورکمانی، مەسیحی و ئەرمەنییەکا دیاریکریێنۍ.
واتەواچەو کۆمسیۆنوو باڵاو عێراقی جومانە غەلاییە بە ئەرەیاۋنێوە نویسیا ئەرەیاۋناش کە پەنج کورسیۍ پەرلەمانوو کوردسانی پەی پێکئامایەکا هەرێمی دیاریکریێنۍ. بە پاو ئەرەیاۋناکەی قەرارەکە جە تەرەفوو لوجنەو دادەوەری هۊرچنیەکا ئەنجوومەنوو باڵاو دادوەری عێراقیوە دریان.
بە پاو قەرارەکەی جە سلێمانینە دووۍ کورسیۍ، هەولێر دووۍ کورسیۍ و دهۆکیچەنە کورسیێوە پەی پێکئامایەکا بۆ.
بەشکەردەی کورسییەکا پی جۊرەنە:
هەولێر: کورسیێوە پەی تورکمانی، کورسیێوە پەی مەسیحی
سلێمانی: کورسیێوە پەی تورکمانی، کورسیێوە پەی مەسیحی
دهۆک: کورسیێوە پەی ئەرمەنەکا.
پی قەرارەو ئیسەی، کورسییەکۍ پەرلەمانوو کوردسانی هەر بە ١٠٠ کورسیۍ مەناوە، ئی پەنج کورسییەی کە پەی پێکئامایەکا دیاریکریێنۍ جە چوارچێوەو ئا ١٠٠ کورسییەینە با کە بە قەراروو دادگاو باڵای فیدراڵی عێراقی پەی پەرلەمانوو کوردسانی دیاریکریێنۍ.
