گەریلاکاو هەپەگەی و یەژا ستاری کە جە مېڎانەکا مڎرامانیوە دژوو ئەرەگیرا ئینۍ جەنگوو مڎرامانینە، ئاماژەشا پانەیەدا کە ئەرەگیرکەرەکۍ سەرو خاکو کورڎەسانیۆ مەسەیاوە و پەنەوازا گەلوو کوردی دژوو خیانەتو پەدەکەی مردۆوە.
گەریلاکۍ ئازاڎیی کورڎەسانی بە چالاکی کاریگەر جە ئاسمان و زەمینۆ جوابوو لەشکرکێشییەکا دەوڵەتو تورکی ئەرەگیری مڎاوە کە بە پەشتگیری پەدەکەی نۊکەری سەرو خاکو پانیشتوو کورڎەسانیۆ دەسشاپنەکەردەن. گەریلاکاو هەپەگەی و یەژا ستاری جە مېڎانەکا مڎرامانوو کەشو ۋەهاری و سەرگەلێ-ەوە پەی ئاژانسیما قسېشا کەردۍ.
'گورزەی جەرگبڕە مڎەیمۍ ۋنەو دووژمنی '
گەریلاو یەژا ستاری، تێکۆشینە سەرنجش وست سەرو لەشکرکێشی دەوڵەتو تورکی جە کەشو وەهاری و سەرگەلێنە و واتش: "وەڵۍ گرڎ چێوێنە هەمڕایاما جانفیدا عەفرین و جانفیدا سۆرۆی بە ڕێز و پنەزانایۆ یاڎۍ مکەرمېوە کە جە ئۆپراسیۆنە ئەرەگیریەکاو ٣ۍ تەمموزینە گەشمەرڎۍ بیۍ. جە حەقەتینەنە ئۆپراسیۆنەکۍ دەوڵەتو تورکی کە سەرو خاکو پانیشتوو کورڎەسانیۆ دەسشاپنەکەردەن تەنیا مەترسیێوە نیەنۍ پەی سەر و کورڎەسانی، جە هەمانکاتەنە پەی گرڎوو جیهانی ئاژێوە مەترسیڎارا. چوونکی مەبەس و مەراموو لەشکرکێشییەکەی ئەرەگیرکەردەی و کۆڵۆنیاڵیکەردەی گرڎوو ۋەرکۊتوو دلېڕاسەیا. نمونېوە فرە ڕۊشنوو ئینەی سەرو خاکو کورڎەسانیۆ موینمۍ. هەر جە سەرەتاو ئۆپراسیۆنەکەیۆ چڼین دەگۍ ئێرشا وەردریانە و کاولۍ کریۍ. کاولکارییەکۍ تەنیا سەرو ئاستو دەگایەکانە نەمردانۆ بەڵکم سۊچنای و کاولكەردەی جوگرافیا و سروشتو کورڎەسانیچا. پېسە هێزو گەریلاکاو ئازاڎیی کورڎەسانی بە تاکتیک و ستراتیجیۆ دژوو ئی ئەرەگیریە مردمېوە."
'خاکو کورڎەسانی مکەرمۍ بە قەبرسانوو سوپاو تورکی'
جە درێژەو قسەکاشەنە گەریلا تێکۆشینە واتش: "پېسە وەڵتەر هەڤاڵا گەشمەرڎەیما واتەنشا خاکو کورڎەسانی مکەرمۍ بە قەبرسانوو سوپاو تورکی، ئێمەیچ سەرو رێبازو گەشمەرڎا، سوپاو تورکی وزمېنە ئاژێوە کە ئیتر حەجگیز نەتاوۆ پایۍ وزۆنە دلۍ خاکو کورڎەسانی. هەر ۋێش جە ئیساتێنە هەڤاڵاما بە جۆر و تەکتیکی گەریلاییوە دووژمنشا کرێڵ دان. سەرەڕاو گرڎوو ئاژە سەختەکا بە هێزو ۋێما گورزەی کاریگەرە مڎەیمۍ ۋنەو سوپاو تورکی. چوونکی ئێمە سەرو بنەماو فکر و فەلسەو ئی جەنگەیۆ ئیراڎەما مردنان و بە باوەڕی و مەرامۆ ئی جەنگەیە مکەرمۍ. پی باوەڕیۆ مەراموو سەرکەوتەی ۋێما بەدەسمارمۍ. بانگەوازییما پەی گەلی ئینەنە؛ هەر کەسێ کە ماچۆ وڵاتپارێزنەنا پەنەوازا ئەرکو ۋێش جابەجێ بکەرۆ و بەشدارو ئی مڎرامانیە بۆ. گەر مڎرامانەکاما بکەرمۍ بە یۆ، پېوەرە زهنیەتی پیسوو ئەرەگیری تورکی و لەشکرکێشییەکاش دمایی پنەمارمۍ".
'ئێگە خاکو ئێمەن'
گەریلا بەرچەمە باسس چانەیە کەرد کە مەراموو ئەرەگیرکەردەیەکا دەوڵەتو تورکی ئەرەگیری سەرو خاکو پانیشتوو کورڎەسانیۆ ڕۊشنبیەنۆ و پی جۆرە بەردەوامە بیە جەقسەکاش: "مەراموو ئی ئەرەگیریە، ناچارکەردەی خەڵکو کورڎەسانیا بە کۆچبەری و دماتەر تاڵانکەردەی خاکەکەیشا. فرە بەڕۆشنی ئینەی جە مېڎانوو سەرگەلێنە موینمۍ کە چنی دەوڵەتو تورکی بۆردوومانو دەگایەکا مکەرۆ و سروشتەکەیشا سۊچنۆ. هەڵوێسوو خەڵکی زیاتەر مبۆ، بەڵام پەنەوازا خەڵکو پانیشتوو کورڎەسانی دژوو ئی ئەرەگیریە مرداوە و نازا ئەرەگیرەکۍ بەیانۍ دلۍ خاکو پانیشتیوە. چوونکی خاوەنو حەقەتینوو ئی خاکەینۍ. پەنەوازا ئیتر بێدەنگۍ نەبا جە ۋەرا ۋەرو سوپاو ئەرەگیرینە کە بە ئیسراحەت جە دەگایەکانە تەراتێن بکەرا و چەتەکا بەربکەرا. ئێگە خاکو ئێمەن، ڕا نمەڎەیمۍ کە ئەرەگیرەکۍ با ئاسانی خاکو کورڎەسانی ئەرەگیر بکەرا. حەقیقەتێوە تاڵی تەریچ ئانەنە کە پەدەکەی نۆکەر، خاکو پانیشتوو کورڎەسانی پێشکەش بە دەوڵەتو تورکی مکەرۆ. هەڵوێسو گەریلاکاو ئازاڎیی کورڎەسانی ۋەرا ۋەر بە ئەرەگیری ڕۊشنا. حەجگیز ناستەنما و نمازمۍ ئەرەگیری و خیانەت سەرگنۆ. هەڵبەتە چنی گەلەکەیما ئینەی مکەرمۍ. با گەلەکەما عال بزانا گرڎ کاتێ گەریلا ئینا چنیشا. قەناعەتما چامنەن کە پێوەرە سەرکەوتەی بەدەس مارمۍ."
'نمازمۍ ئەرەگیرەکۍ سەرو ئی خاکیۆ سەیاوە'
گەریلاو هەپەگەی ئەرداڵ کە جە مېڎانوو مڎرامانوو سەرگەلێ-ەوە ئینەش وات: "ئۆپراسیۆنەکە کە جە ٣ۍ تەمموزیوە جە سەعات هەشتوو وێرەگایۆ جە لایەنو دەوڵەتو تورکی ئەرەگیری و بە پەشتیوانی پەدەکەی دەسسپنەکەرد، دەموودەس بە جۆر و تەکتیکی تازە و کاریگەرۆ جە لایەنو هەڤاڵاماوە بە شێوێوە سەخت گورزەشا جە ئەرەگیرا شانا. هەر چنی گورزەکا سوپاو تورکی جە یاگۍ ۋێشانە چەقۍ. پێشوازیکەردەی گەریلای بە مڎرامانەکاشۆ جە سوپاو ئەرەگیری پەیامو ئانەیش دا بە ئەرەگیرا ئێگە خاکو کورڎەسانیا هەر کە هەنگامېوە منیا ئانە مبۆ بە قەبرسانشا. حەرپاسە پەدەکە کە خاکو کورڎەسانی پێشکەش بە ئەرەگیرا مکەرۆ، پەنەوازا بە ۋێش بواچۆ کە ئیتر وەسێن خیانەت. پەنەوازا گەلوو کوردی جە دژوو خیانەتو پەدەکەی مرداوە. هەرچیۍ ڕووە مڎۆ گرنگ نیا لاماوە، پۊکەی پېسە گەریلاکاو ئازاڎیی کورڎەسانی نمازمۍ ئەرەگیرەکۍ سەرو ئی خاکیۆ سەیاوە. ئانەی سەیرا ئانەنە ئەرەگیرەکۍ چنی واردەی هەر گورزێوە، توڕەی شکسوو ۋێشا بە سۊچنای دەگایەکا و بۆردوومانکەردەی دارسانەکا کورڎەسانی بەربڕا. قەولما پەی گەلەکەیما ئانەنە تا کورڎەسانی ئازاڎ جە مڎرامانی بەردەوامۍ بیمۍ."
