ناوەندو ئەرەیاونای هێزەکاو سوریای دیموکراتیک (قەسەدە)ی بە ئەرەیاوناێوە شناسنامەو ڕۊنی وڵاتی، یۊ جە  فەرماندەکاو وێش ئاشکرا کەرڎەن، کە دێرەزورنە گەشمەرڎە بییەن.

ئەرەیاونایەکەنە ئامان:

"بە سەربەرزی و بڕوامەندبییەی بە سەرکەوتەی، فەرماندەیی گردینو قەسەدەی گەشمەرڎەبییەی ئەندامو ئەنجوومەنی سەروازی و ئەندامو فەرماندەیی ئەنجوومەنی سەروازی دێرەزوری فەرماندە ڕۊنی وڵات/ شێروان حەسەنی ئەرەیاونۊ.

ئاماژە پانەیچە کریان، کە فەرماندە ڕۊنی وڵات ئەنجامو هجومێوە تیرۊریستیی تەرسنۊکانەینە  وەرکەوتو دێرەزورینە و وەختو  پۊڕنای هەرمانە نەتەوەیی و ئەخلاقییەکێشنە گەشمەرڎە کرا.

حەر جە ئەرەیاوناکەینە ئامان، گەشمەرڎە ڕۊنی یوەمین فەرماندەکا بۍ، کە بەشدار بۍ جە ئەرەمەرزنای و وەشکەرڎەی هێزەکاو هەرمانەو وێپاریزنای و دەوری کاراش جە پەروەرڎەکەرڎەی جەنگەوانا و ڕێکوستەی ئا هێزانە گێڵنان. تارێخێوە پەڕ جە گیانبازییش هەن و مەیدانەکاومدرامانینە بە قارەمانێتی، زانابییەی و دەسوەڵێوستەی ئشناسیۍ و دەورش جە پەرەپەنەدای بە گیان و بنەماکاو برایەتیی گەلا و پووچەڵکەرڎەیوە فیتنەی و ئاژاوۍ بڕۍ لایەنا دێرەزورنە بییەن.  

پا بۊنەوە فەرماندەیی گردینو قەسەدەی سەرەوەشیی سەرجەمو جەنگەوانا، گەلو سەرنیشتی و وەرکەوتو سوریای و بنەیانەو گەشمەرڎەی کەرڎەن.

قەسەدە وەعدو وەفاداری و پابەندبییەیش بە ئامانجەکاو گەشمەرڎاوە ئەوەخوای کەرڎەنۊ و جەختیچش کەرڎەنۊ، کە ئا تیرۊریستۍ گەشمەرڎە ڕۊنی وڵاتشا تیرۊر کەرڎەن جە سزۍ نەجاتشا مەبۊ و سزا مدریا.

زانیاری سەرو شناسنامەو گەشمەرڎەی:

نامۍ جمیەری: ڕۊنی وڵات

نامۍ و دمانامێ: شێروان حەسەن

نامۍ تاتەی: حسێن

نامۍ ئەدێ: هەدیە

یاگۍ و وەختو پەیدابییەی: قامیشلۊ/ ١٩٧٩

یاگۍ و وەختو گەشمەرڎەبییەی: دێرەزور/ ٥ی کانونو یوەمو ٢٠٢٣".