پارېزناو مافوو ژیۋای گەلێوە کە زۋانشا قەڎەغە کەرڎەن، نکوڵی جە بیەیشا کریۆ، وڵاتەکەشا پارچە پارچەکریان، پەیوەنڎیش بە ئەخلاقیوە هەن. پۊکەی ئەخلاق سەرچەمە و وزەی سەرەکی پرۆسەو سەختی و زەحمەتوو گەریلاکاو پەکەکەین. ئی ڕۍ پەیوەندیش بە وەشەسیایی، عەقڵ، ڕۆح و ڕاسی دڵوو ئینسانیوە هەن. یۆ جە ڕێوگارا ئاخېزوو کوردسانی دڵگەش شەڕزان (مەحمود ئۆزدەمیرا).

شاروو مدرامانی و سەرهۊردای، نسێبین، کە سەڎان قارەمانۍ چاوە سەرشا هۊردان، ئا شارەنە کە هامڕا دڵگەش چنەشەنە جە ئەڎۍ بیەن. گەریلا دڵگەش چی شارەو مدرامانینە جە بنەیانېوە وڵاتپارێزینە جە ئەڎۍ بیەن. پېسە فرېوە جە بنەیانەکا، ۋەروو ئانەی بنەیانەکەش و دەوروبەرەکەش وڵاتپارێزۍ بېنۍ، جە زارۊڵەیینە هوشیاری کوردایەتیش هۊرگېرتەن. دڵگەش جە نزیکۆ سیاسەتەکاو سەرکوتی و کۆکوشی دژوو گەلوو کوردی ۋینۍ، ۋېش ڕووبەڕووش مرداوە. پېسە هەزاران قارەمانا کوردی تووڕەیېوە گەورەش ۋەران ۋەر بە دەوڵەتوو فاشیستی تورکی بۍ. بەشداریۍ چالاکانەش جە سەرهۊرداکاو نسێبینینە کەرڎ. وەڵۍ ساڵەو ٢٠١١ی، دماو هجومە سیستماتیکیەکاو دوژمنی پۍ سەروو گەنجاو کوردی جە میترۆپۆڵی تورکیاینە، یاوا ئا قەناعەتەی کە مشۊم درێژە بەکۊشیای چالاکانە دژوو دوژمنی بڎۆ، پۊکەی ڕووەش کەرڎە کەشەکاو کوردسانی و بەشداروو ڕیزەکاو گەریلای بی.

گەریلاو هەپەگەی دڵگەش هەرێموو جیلۆینە بەشداروو چالاکییە کردارییەکاو گەریلاکا بی، بە کردەوە خەتەو گەریلایی سەردەمی تازەیش جە کەسایەتی ۋېشەنە جابەجێ کەرۍ. دڵگەش شەڕزان کۊشیایش جە سەرنیشتوو کوردسانینە کەرڎ بە ئەرکوو ۋېش و پۍ ئینەیچ بەردەوام ۋیرش ۋنە کەرېوە. یاوا ئا قەناعەتەی کە حەقەو کۆکوشییەکاو دوژمنی کە سەروو گەلوو کوردیرە سەپنۊشا، تەنیا جە سەرنیشتوو کوردسانی بە گورز ۋنەشانای جە دوژمنی کریۆ حەقە کریۊوە و سەروو ئی قەناعەتیە لووان سەرنیشت و چا درێژەش بە جەنگی گەریلایی دان. گەریلا دڵگەش هەمیشە دەم بە خووە بۍ و کەسایەتیېوە ئەنەیاواش بۍ، جە حەر شۊنېوەنە بیۍ وەشەسیای و ڕێزش ۋنەگیریۍ. دڵگەش و هەپەگەی جە هەرمانەکاشەنە ڕشدوو بەدیقەت بۍ، بەتایبەتی جە مەشقی سەروازینە، جە بەشوو سابۆتاژینە چنەئاما بۍ. مۆرەو ۋېش سەروو فرېوە جە چالاکییە پیشەییەکا و هەرێموو گارزانی دا. گەریلا دڵگەش کە ماوېوە فرە جە هەرێموو گارزانینە مەنۆ و بە کەسایەتی ۋۍ نەویسوو ۋېش گرڎ چېوېش کەرڎ، حۊڵ دۍ هەمیشە ۋەرپرسیارێتی شۆڕشگێڵنانەو ۋېش جابەجێ کەرۆ.

ساڵەو ٢٠٢١ ی دەوڵەتوو تورکی ئەرەگیری هجومش کەرڎ سەروو فرېوە جە هەرێمەکاو گارزانیچ. هەڤاڵ دڵگەش ئازایانە چنی هەڤاڵەکاش جەنگشا کەرڎ و گورزەی قورسەشا ئەو دوژمنی دا. ئەرەگیرەکۍ کە نەتاواشا جە وشکانیۆ ئەنجام بەدەس بارا، دماجار جە ٢٠و ئەیلوولوو ٢٠٢١ ینە ئی قارەمانە کوردېشا جە ڕای ئاسمانیوە بۆردومان کەرڎۍ. جە ئاکامەنە دڵگەش شەڕزان و ئەرداڵ شۆڕش گەشمەرڎۍ بیۍ و لووۍ دلۍ قافڵەو گەشمەرڎاوە. گەشمەرڎە دڵگەش و گەشمەرڎە ئەرداڵ میراتێوە گەورەو کۊشیایشا جیائاست. ئیسە کۊشیای بە میراتیشا بەقوەتتەرا و ئەرکوو تاریخی ئێمەن کە شایستەو ئاڎیشا بیمۍ.