بومەلەرزەکەو بەحروو مەڕمەڕەی نیگەرانیەکېش سەروو ئاژەو رابەروو گەلوو کوردی عەبدوڵا ئۆجالانی زیاتەر کەرڎېنۍ، کە نزیکەو یەرۍ ساڵان حیچ هەواڵێوەش مەزانیۆ. جمیەروو ئازاڎیی ژەناو ئێزدی (تاژێ) جە ناحیەو سنونێی شەنگالی کۆنفڕانسێوە ڕۆنامەوانیشا سازکەرڎ و ئەرەیاۋنېوەش سەروو ئا مژاریە ۋەناوە.

جە ئەرەیاۋناکەنە کە جە لایەنوو شەمێ رەمۆیوە ۋنیاوە، ئامان: "وچیۆ بومەلەرزە چا یاگېنە ڕووەشدان کە ڕابەرایەتی چنەشەنە زینڎانیا، ئانەیچ نیگەرانیەکۍ ئێمەش جە بارەو ئاژەو ڕابەر ئاپۆیۆ زیاتەر کەرڎەن. بەنامۍ ژەناو ئێزدیۆ داوا جە سی پی تی کەرمۍ کە بە زووتەرین وەخت دیڎار چنی ڕابەرایەتی ساز کەرا و گەلی جە ئاژەکەی ئاگاڎار کەراوە".

ئاماژە پانەیچ کریان، "ئیسە ئاژەو ڕابەرایەتی ئینا مەترسینە ئا ئاژە مایەو قبوڵکەرڎەی نییا. ۋەروو ئانەی ئێمە داوا جە گرڎوو گەلەکەیما جە چوار پارچەو کوردسانی کەرمۍ، تا زانیاری سەروو ڕابەر ئاپۆی هۊرنەگیریۆ، نەسرەوا و بەردەوامۍ با جە چالاکی".

کۆنفڕانسە رۆنامەوانیەکە بە دروشمەکاو "بژیۋۆ سەرۆک ئاپۆ" و "بێ سەرۆکی ژیۋای مەبۆ" دمایش پنەئاما.