تەڤگەروو گلێرگەو دیموکراتیکی (تەڤ-دەم) سەبارەت بە هجوومەکا دەوڵەتوو ئەرەگیروو تورکی سەروو سەرنیشت و ۋەرکەوتوو سوریای، بە ئامانجگێرتەی مێڎانە مەدەنی و چاندییەکا ئەرەیاۋنێوە نویسیاش وەڵاکەردۆ.

جە ئەرەیاۋناکەینە ئاماژە پانەی کریان دەوڵەتوو ئەرەگیروو تورکی و چەتەکێش چی ڕووانە کانتۆنەکاو عەفرین-شەهبای و منبجی بە سەختی بۆردوومان مکەرا. ئەرەیاۋییا جە دەگاو سموقەی شەهباینە کۆمکوشیێوەش ئەنجام دان، جە ئاکامیچەنە ژمارێوە فرە مەدەنیۍ زامڎارۍ بیێنۍ کە زاوڵێچشا ئینۍ دلێنە.

هەر جە درێژەو ئەرەیاۋناکەینە ئاماژە پانەی کریان هجوومی ڕاسەوخۆ سەروو مێڎانەکا چاندی و هاموڵاتیا پاشێلکەردەی یاسێن و ماچۆ: "دەوڵەتوو تورکی سیاسەتوو 'حەرچێوۍ بێنە ۋەروو دەمیش سۆچنۆش' ڕاوەبەر مکەرۆ. ئی سیاسەتە بەردەوامیداین بە سیاسەتوو قڕکەردەی سەروو گەلەکەیما."

جە دمادمایی ئەرەیاۋناکەو تەڤ-دەمینە ئانە دەسنیشانکریان ۋەڵۍ گردینە کۆچبەراو کانتۆنوو عەفرین-شەهبای جە ۋەرا ۋەروو دەوڵەتوو ئەرەگیری تورکی و سەپنای تەوقەو حکومەتوو شامینە مدرامان مکەرا و ماچۆ: "دەوڵەتوو تورکی پەی حەق کەردەیۆ جە مدرامانوو بە ئیرادەو گەلی زیاتەر هجووم مکەرۆ. ئی ئیراڎە و مدرامانەیچ زەمینەو ژیۋای ئازاڎییا. پۊکاتی پێسە تەڤ-دەمی داوا جە نەتەوەیۆگێرتەکا و گلێرگەی میان نەتەوەی مکەرمۍ، فشار سەروو دەوڵەتوو ئەرەگیری بکەرۆ هجووم و تاوانەکا دژوو ئەرەنیشتا هەرێمەکەی مردنۆنە. دەوڵەتوو تورکی ئیسفاڎە جە بێدەنگی میان نەتەوەی هۊرگێرۆ و هجوومەکاش زیاتەرۍ مکەرۆ."