بە بۆنەو سەردای وەرپەرساو دەوڵەتی ئەرەگیرکەروو تورکیوە پەی عێراقی، دەسەو ڕاوەبەریی تەڤگەروو ئازاڎیی گلێرگەو کوردستانی ئەرەیاوناێوە نویسیاش وەڵا کەردۆ و ماچۆ: "دەوڵەتی ئەرەگیرکەروو تورکی دماو شکستەکاش سەروو سنوورەکاو پانیشتوو کوردستانیوە، ئی جارە بە سەردایەکاش پەی عێراقی بەنیازوو پیلانگێڵنیی تازەین".

تەڤگەروو ئازاڎی دەربارەو ئامانجەکاو دەوڵەتوو تورکی ماچۆ: "سەدێوە زیاتەرا ئا دەوڵەتە زھنیەتنەوەشەو تورکیای،  گرد سەودا و سیاسەتێوەش بەرۆ و دلێنە پەی دلێنەبەردەی جمیەروو ئازاڎییوازیی کوردان، ئانە کە ئیساتێ ئەردۆغان گەرەکشا بکەرۆش، حەر دژوو کوردی نییا، بەڵکوم  پەی ئەرەگیرکەردەی خاکە دەسنەبەرشییەکاو سەردەموو عوسمانیین، بە ئاشکرا چەمش بڕیەن کەرکوکی و موسڵی و ھەولێری".

تەڤگەروو ئازاڎی ئاماژە بە شکستوو دەوڵەتوو تورکی مکەرۆ بەهامکاریی ناتۆی سنوورەکاو پانیشتوو کوردستانینە، پەوکای دەسش کەردەن بە دیدار و کۆبییەیۆی هەمەلایەنەی و سەردایەکەو ئی دماییەیچە پەی بەیاگەیاونای پیلانێ ئەرەگیرکاریێ تازێن.  

 درێژەنە تیشکە وزیێنە سەروو هامکاریی پەدەکەی و ماچۆ: "پەدەکە بۆنەو شکسەکاشۆ عێراقنە، کەوتەن خزمەتوو ئا پیلانگێڵنی و ئەرەگیرکارییەو دەوڵەتوو تورکیای، دژوو حکومەتوو ئیساتێ عێراقی و گەلوو کوردی، مشۆم گردوو گەلی بە سەرجەموو ھێزە نیشتیمانییەکاشەوە، دژوو ئا پیلانگێڵنی و تێکدایەو دەوڵەتی ئەرەگیرکەروو تورکیای، بەرێوە نیشتمانیینە بمردانێ".

ئاخرۆ تەڤگەروو ئازاڎی داوا وەنەو دەوڵەتوو عێراقی مکەرۆ و مواچۆ: "چەمەڕایی ئانەیە جە دەوڵەتوو ئیساتێ عێراقی ئانەنە، نەبۆ بە ھامبەشوو تاونەکاو دەوڵەتی فاشستوو تورکیای، ڕا جە دەسوستەینەیەکاش گێرۆ ئا ھێز و لایەنێ ھامکاریی ئا دەوڵەتەیە کەرا، مشۆم پێسە خائینی سزاشا بدۆ، گەلەکەیچما ھەرێموو کوردستانینە، چەنی ھەڵوێستی نیشتیمانییش دابۆ، ئانێچ ئارۆ ھامکاریی ئا پیلانگێڵنی و ھجووماو دەوڵەتوو تورکیاینێ، ئانێنێ کە دژو قەرارەکاو دادگای فیدراڵی و داوایەکاو خەڵکوو کوردستانی مردێنێ".