هرووژمە ئەرەگیریەکۍ دۆڵەتو تورکی پەی سەرو سەرنیشت و ۋەرکۆتوو سوریای جە ئامەدەنە ناڕەزایی جەماوەریش چنە کۆتۆ و جە ۋێنیشاندایێنە ئەرەیاۋییا کە جە ڕاو ئا هرووژماوە تاوانەو جەنگی ئەنجام مڎریۆ.
ئامەدەنە جە بارەگاو ڕێکوستەی پارتو هەرێمە دیموکراتیکەکا (دەبەپە)ی سەبارەت بە هرووژمەکا دۆڵەتو تورکی پەی سەرو شارەکا سەرنیشت و ۋەرکۆتوو سوریای بەیاننامۍ ۋنیاوە و هرووژمەکۍ شەرمەرزار کریۍ. ڕاوەبەرا پارته سیاسیەکا، ڕێکوزیاکا گلێرگەی مەدەنی و جەماوەرێوە فرە به شدارۍ چالاکیەکەی بێنۍ و دروشمەو "جەنگ کوشتوبڕ و مەرگا، ئاشتی ژیۋای خوڵقنۆ" بەرزکریاوە.
سوڵتان یارای هامسەرۆکو دەبەپەو ئامەدی جە چالاکییەکەنە ئەرەیاۋناش؛ "ئاکەپە و مەهەپە دەسشا پەی کوردا درێژ کەرڎ و واتشا: 'ئێمە پرۆسێوە تازە دەس پنەمکەرمۍ'، بەڵام کاتێ تەماسەو کردەوەکاما کەرڎ دژمنایەتی ۋێشا ۋەرا ۋەر بە کوردا نیشانەدا و خەڵکی مەدەنی ۋەرنیشتەنە مکەرا ئامانج. هاموڵاتیا مەدەنی و زاوڵا جە هرووژمەکا سەرو خەسەخانەی و کارگەکانە گیانشا جە دەسدان. ئێمە ئینەیە بە دووڕوویی نامۍ بەرمۍ. ئیتر کورد پا قسا هۆرمەخەڵەتیۆ. دمایی بە جەنگی باردۍ. تا ئا کاتەی ئی جەنگیە مردندۍ بەردەوامۍ بیمۍ جە ئەرەکۆشایما."
هەرپاسە عەباس شاهین هامسەرۆکو پارتو یەکسانی و دیموکراسی گەلا ئاماژەش پانەیچکەرڎ کە جە هرووژمەکا ئی دماییەینە ٢٧ کەسۍ کوشیێنۍ کە زاوڵەیچشا ئینا چنە. شاهین ئاماژەش پانەی دا، کۆمکوژییەکۍ جە کاتێنە ڕووە مڎا کە قسۍ "ئاشتی دلێینەی" مکریۆ و واتش، "بەسیاسەتو جەنگی و چارەسەری نمۍ دی. بە دەسەڵاتدارا ماچمۍ؛ ڕا نمەڎەیمۍ ئی خاکە بکریۆ بە مێڎانو جەنگی. هەرپاسە داواو دمایی ئارڎەی بە هرووژم و ئەرەگیریەکا مکەرمۍ".
عەدالەت کایا پەرلەمانتارو دەم پارتی ئامەدی، ئەرەیاۋناش نانەواخانە و خەسەخانەکۍ کریێنۍ ئامانج و واتش: "هرووژمەکۍ دژو ئا کەسا کە ئیراڎەو ئاشتی و چارەسەریشا متەنەرە ئەنجام مڎریۆ. ئارۆ سەڎەنە ٨٠و گلێرگەی دەسو هەژارییوە ناڵنۆنە. ناوچە گرڎیەکۍ جە لایەنو چەتەکاوە ڕاوەبەر مکریا، ژەنی کۆمکوژۍ مکریا، زاوڵۍ عەزیەت مکریا ئیساتۍ کاتو ئانەی ئامان ئاشتی جە دلێنەو و جبەرو وڵاتی بەدی بۍ. داوا جە گرڎو ڕێکوزیا دێموکراتیکەکا مکەرمۍ دژو هرووژم و سیاسەتە جەنگەوانەکا دۆڵەتی مرداوە. ئێمە عەیامێوەن پەی ئاشتی هەمیشەیی ئەرەکۆشمۍ."
