ئاسیە ئەلچیچەک-ە کە جەنازەو کناچە گەشمەرڎەکېش ئاخین سەیدۆ (مەنفیات ئەلچیچەک)ەش جە کارتۆنېوەنە دریاوە دەس، ئەرەیاۋناش، "توڕېنا، سەربەرزەنا، چېشا دەسەنەمۍ با کەراش، دەرەقەتوو ئێمە نمەیا، با چنەما تەرسا".
جە ١٤ و ١٥و ئەیلول و ٢٠١٨ینە جە هەرێموو کاتۆ مارینۆسی سەر بە مەنتیقەو ئەلکێی شڕنەخی بەینوو گەریلاکاو هەپەگە-یەژاستاری و سەروازاو تورکینە جەنگ ئاما ئاراوە. چا جەنگەنە گەریلاو یەژاستاری مەنفیات ئەلچیچەکە (ئاخین سەیدۆ)، بەرنا یالمان (هیرا هێڤیدار)، گولەر ئۆبەی (نوپەلدا سێرت)، ئازاد ساتلمش (ئازاد زاگرۆس) و توگای چەلیک (رەشید هۆگر) گەشمەرڎۍ بیۍ. دماو ئانەی ڕاوەبەری پۆلیسوو جۆلەمێرگی بنەیانەو ئەلچیچەکېش ئاگاڎار کەردۆ، بنەیانەکە دەموودەس لوۍ جۆلەمێرگ و وشکنای دی ئێن ئەیشا کەرڎ. سەرەڕاو ئانەی دماتەر بە بێ ئاگاڎارکەرڎەیۆ بنەیانەکەیش، جەنازەو ئا گەشمەرڎۍ جە قەبرسانوو بێکەساو جۆلەمێرگینە ئەسپەرڎە بەخاکی کریا. جە دووە ڕۊی ۋیەرڎەنە ڕاوەبەری پۆلیسوو جۆلەمێرگی پەیوەنڎیش بە بنەیانەو ئەلچیچەکېوە کەرڎ و پنەش واتۍ کە جەنازەو کناچەکېشا ئینا دکتۊروو داڎوو ئیستەنبوڵینە. حەرپۊکەی بنەیانەکە لووۍ پۍ دکتۊروو داڎی جە ئیستەنبوڵ و ۋەرپەرساو دکتۊروو داڎی جەنازەو ئا گەشمەرڎېشا جە کیسێوە کەوە و کارتۆنێوە چەرمەنە دېوە دەس.
'شێوازێوە ئەشکەنجەداین'
ئەڎا ئاسیە ئەلچیچەک-ە ئەرەیاۋناش، کە ئاڎۍ ٥ ساڵۍ بۍ چەمەڕاو هۊرگېرتەیۆ جەنازەو کناچەکېشا بېنۍ، بەڵام رادەسکەرڎەیۆ جەنازەکەی دلۍ کاترۆنېنە شێوازێوە ئەشکەنجەیا. ئاسیە ئەلچیچەک-ە ئانەش وست ڕووە، بەمەڵامەتوو رادەسکەرڎەی جەنازەکەی دلۍ کارتۆنینە، فرە توڕېنۍ و واتش، "ئاڎۍ جە ئێمە تەرسا".
ئەڎا ئەلچیچەک-ە واتش، "فرە توڕېنا و وەختۍ جەنازەکەم پا جۆرە دیەن واتەنم 'من قوربانەو ئا جەنازا بوو'. پۆلیسەکۍ چواردەورشا گرتا، بەڵام نەتاواشا حیج کەرا. من پەنج ساڵۍ چەمەڕاو جەنازەو کناچەکېم بېنا. گرڎ وەختۍ بە تاسەو ۋینایۆ جەنازەو کناچەکېم بێنا. وەختۍ جەنازەکەشم دلۍ کارتۆنینە دی خەمبارە و توڕۍ بیا. بەڵام مزانوو فرەو ئەڎایا هەنۍ بە ئاواتوو ۋینایۆ ئێسک و پروسکوو رۆڵەکاشانۍ. جەنازەکەم ئارڎۆ یانە فرە سەربەرزەنا".
جە دما دمایینە ئەڎاو ئا گەشمەرڎۍ واتش، "حەرچی کەرا با کەراش، بەئێمە مەیارا. ئانۍ کە تەرسا ئاڎېنۍ. ئانەی کەراش بە مەڵامەتوو تەرسېشانە جە ئېمە".
