هێلین ئومیتە ئاشکراش کەرد کە ئا قڕکەردەی و گۆشەگیرییەی سەروو گەلوو کوردیرە سەپیان، جە کۊکوشی گەلوو فەلەستین جددیتەرا و واتش، " پۊکەی مشۊم کۊشیایما بە دەنگێوە بەرز بە جەهانی بیاونمۍ، ڕێکوستەی ۋێما وەڵۍ وزمۍ".
ئەندامەو کۆمیتەو ناوەندی پەکەکەی، هێلین ئومیتە، بەشداریش جە بەرنامێوە تەلەفزیۆنی میدیا هەبەرینە کەرد و لووایۆ پۊرەیش بە پرسە گرنگەکا ڕۊیرە کەرد.
هێلین ئومیتە سەرەتا سڵامش جە مدرامانوو ئیمرالی کەرد و واتش: "بەنامۍ پارتوو ئازاڎیی ژەنا کوردسانی پاژکی، پیرۆزبایی ٨و مارسی جە ڕابەر ئاپۆی کەروو، بەڕاسی جە ڕابەر ئاپۆیۆ فێروو هەڤاڵیەتی بەقوەتی، وەشە سیای و وۍ نەویسی بیەیمۍ". پۊکەی ڕابەر ئاپۆ فرەتەرین مافوو ئانەیش هەن کە ٨و مارسیش ۋنە پیرۆز کریۆ."
هێلین ئومیتە ویرش ئاوردۆ کە سیستموو قڕکەروو ئیمرالی کە دژوو ڕابەروو گەلوو کوردی عەبدوڵا ئۆجالانی مەرزیارە، هەڵای بەردەواما و واتش: "ئێمە ڕووبەڕوو ڕاسیێوە ڕابەرایەتینمۍ کە ڕووانە زیاتەر و زیاتەر میاوۆ بە ئاستوو ڕابەرایەتیێوە جەهانی، تا زیاتەر جە ڕاسییەکا ڕابەر ئاپۆی بیاومێنە، گەلا جەهانی، ژەنا، گەنجا زیاتەر خاوەنداریش ۋنەکەرا، چەمڎارێوە عال متاوۆ ئی فاڕیای و فاڕیایا بە شێوێوە ڕۊشنتەر بوینۆ. جە ئەمریکای لاتینۆ پۍ ئاسیای، جە ۋەرکەوتوو دلێڕاسەیۆ تا ئەمریکا، جە گرڎ یاگێنە ئی حەقەتینە وینیۆ."
جە درێژەو قسەکاشەنە، هێلین ئومیتە کۊکوشی هەڵەبجەیش جە ساڵەو ١٩٨٨ ی و کۊکوشی گازیێ، ساڵەو ١٩٩٦ی و کۊکوشی ساڵەو ٢٠٠٤یش بە ڕێزدارییوە بویرئاردێوە و واتش: "داخەم مەشۆ جە ۋەرکەوتوو دلێڕاسەینە مدرامان و کۊکوشی هامشێوۍ چانۍ فرۍ هەنۍ. گلێرگەی کوردی، گەلوو کوردی ، بە تایبەتی جە سەڎەی ۋیەردەنە، ڕووبەڕوو ئی کۊکوشیە بیێنێوە، سەرنج بڎەیدۍ کۊکوشیەکۍ سەڎەی ۋیەردەی یاڎمانە مەنێنۍ، هجووم و کۊکوشیەکۍ سەڎەی ۋیەردەی کاریگەری کۊکوشی هەڵەبجەی تا ئیسەیچ سەرماوە مەنەن.
گلێرگەو پانیشتی تا چن جە کۊکوشی هەڵەبجەی میاوۆنە و چنی ئا پرسیارا 'ئامانج جە کۊکوشیەکەی چێش بۍ، گەرەکشابۍ چێش کەرا؟' کە رووبەڕووش بیەیۆ ئا وەختە متاوۆ ئیراڎەش بۆ. بەڵام تا زیاتەر چی ڕاسیە بڕەمی، زیاتەر جە ۋێش دوور گنۊوە. سەدام بی بە مەڵامەتوو ئی کۊکوشیە. قامیشلۆیچەنە ڕژێموو بەعسی کەردش. کۊکوشی غازیێ جە تەرەفوو دەوڵەتوو تورکیوە جە دژوو عەلەوی و کوردی ئەنجام دریا. بەڵام مەڵامەتوو ئینیشا کێن؟ وەشکەروو ئی سیستەمەیە کێن ؟ خاوەنوو سەرەکی ئی سیستمەیە کێن؟ ۋەروو ئانەینە گلێرگەو کوردی مشۊم ڕووبەڕوو ئینەی بۆوە. چونکی گلێرگەی کوردی مەتاوۆ چنی مۆدێرنیتەی سەرمایەداری ڕێک گنۆ. مەتاوۆ چی سیستەمەنە یاگۍ ۋێش گێرۊوە. پۊکەی پێویسا سیستموو ئازاڎیی ۋێش ئەرەمەرزنۆ. جیا چانەی هیچ ڕێوەتەر نییا.
فێربیەی بە کۊکوشی چێوۍ خراپا. جە ڕاسینە ڕووەنە کۊکوشی و کوشتەی ئەنجام مڎریۆ. کوشتەی بیەن بە پێناسێوە چانە کە ڕووانە بەکارش مارمۍ. ئایا ئێمە جە جددی و قورسایی ئی پێناسەیە میاومێنە؟ پۊکەی گەرەکما نموونێوە جە ڕابەر ئاپۆی بارووە. ڕابەر ئاپۆ وەختۍ باس جە سەردەموو ئەنەیاوای سەرەتایی کەرۆ، شۊنەو پێناسێوەرە گێڵۆ پۍ واقیعوو کوردسانی جە تورکیانە جە حەفتاکا ۋیەردەینە. چێش ڕووە مڎۆ؟ ڕابەرایەتی جە پارێزنامەکاشەنە زیاتەر ئی حەقەتینێشە شی کەردێنۍ. پاسە باس کەرۆ، ئانۍ ئا سەردەمە بەنامۍ کوردیوە مامەڵە کەرێنۍ، جە ئاژێوەنە بێنۍ کە ۋێشا بە ۋێشاشا کەردەبۍ. ئێمەیچ ئینایمۍ چا ئاژەنە یان نا؟ واتش، پۍ بیەیۍ، باسکەردەی جە ڕاسی بیەی و نەبیەی مژارێوە فرە گرنگ بۍ. ویرش چنەکەرۆ; ئاڎۍ تۆشا یاۋنا بە ئاستێوە چانە، واتە بە زۆر، بە مەعنێوەتەر چا سەردەمەنە، سەردەموو فاشیزمی توندڕەوی هیچ چێوێش بە نامۍ کوردیوە ناستۆ. بێدەنگ پێسە قەبرسانی، پێسە قەبرەنە ئەسپەردە کریابۆ. نە جە کتێب و وەڵاکریاکایچەنە باسش چنە نەکریۍ. نەوەک ئیسە. ئیسە بە ووشۍ 'برا کوردەکام' دەس بە قسەکەردەی کەرا، بەڵام چا وەختەنە چێوۍ چانە نەبۍ. ڕابەرایەتی ماچۆ من چا وەختەنە چنی هەڤاڵی ئێژایم حەقی بێنا. پێناسەو ئەرەگیریم بەکارئارد. بە دزییوە چپنام گۆشێشەرە، کوردسان ئەرەگیرکریان. وە پیاڵە چایەکەو دەسیم کۊتەرە وار. ڕابەرایەتی گەرەکشا چی بارۆ چێش واچۆ؟ رابەرایەتی نیشانە مڎۆ کە ئی پێناسە چنڎە جددییا و ئەرەگیرکەردەو کوردسانی چنڎە جددییا.
یا ئازاڎیی، یا ئازاڎیی، یا بیەی، یا بیەی
ڕابەر ئاپۆ واتش، دووەمین ویرئاردەیۊم ئیمرالینە ویر کۊتۆ. ئاماژەش پانەیچ کەرد، پێویسا سیستموو کۊکوشی بە هجوومکەردەی سەروو کوردی پێناسە کریۆ. چونکی پێناسێوە فرە جدییا. ژیۋای بە کۊکوشی واتە کۊتەی و دلێنەشیەی مرۆڤایەتی. مەبۆ چی جۆرە ئاژەنە بێچارە مەنمۍ. پۍ ئێمە تەنیا ڕا ئازاڎییا و هیچ ڕێوەتەر نییا. ئانەی هەن ئانەنە. جوابێوە کە مشۊم چی ڕووا کۊکوشیەینە بڎەیمێشۆ، ئانەنە کە عەقڵ و یاڎەوەریما بە زینڎەیی بازمێوە. من باسوو تۆڵەی تنی مەکەروو. پێویسا جە ۋەرپەرسا کۊکوشیەکا ۋنەپەرسایۆ کریۆ.
پۍ نموونەی گەلوو فەلەستینی غەززەنە کۊکوش کریۆ. واتە هجووم هەن، هجومی کۊکوشی. کۊشیای گەلوو فەلەستین حەقا. بێگومان ئینسان مشۊم چنی خەڵکی بۆ. بەڵام ئاڎۍ دەنگوو کوردا مەژنەوا، ، گرڎ جۆره کۆنەپەرەستیێوە ۋەروودەم و جەهانینە دژوو کوردا بەکار مارا، ئینە قبووڵکریا نییا. کۊکوشی و گۆشەگیری سەپیا سەروو کوردیرە چێوۍ فرە جیاوازا. هەر پۊکەی ڕابەر ئاپۆ واتش ئێمە پێسە گەلەکەیما تەنیۍ نمۍ. بەڵام ئێمە ئیسە بە کۊشیای ۋێما ئی ڕێچکەیە ماڕمۍ. ئێستا جە دنیانە دۆسۍ گەلوو کوردی فرێنۍ گرد ئینەی مزانا. گرڎ زیاتەر مزانا جە کوردسانەن کۊکوشی هەن، دەسەڵاتێوە فاشیست، سیستمێوە جەهانی هەن کە گەرەکشا کوردی دلێنەبەرۆ. بەڵام تواناو ئانەیشە نیەنە. پێویسا گەلەکەما زیاتەر درێژە بە کۊشیای ۋێس بڎۆ. ئیسە حیچ چێوۍ تەر گرنگتەر جە کۊشیای پۍ ئازاڎیی گەلوو کوردی و ئشناسنامەیش نییا ئەنجامش بڎۆ. پۊکاتی پێویسا پرسوو کۊشیای ئازاڎیما بیاونمۍ بە گرڎوو جەهانی، ئینە ئەرکی سەرەکی ئێمەن."
پێویسا گەلەکەما جە هۊرچنیەکانە ۋەرپرسیارانە دەوروو ۋێش بەکار بارۆ
هێلین ئومیتە جە درێژەو قسەکاشەنە سەبارەت بە هۊرچنیە دلێینەییەکا هۊرسەنگنایش کەرد و واتش: "ڕۆژەڤی هۊرچنیە دلێینەییەکا و ئاژەو وای هیچ جیاوازیێوەش چنی ئاژەو جەنگی نییا. بەڵێ ئەجێنداو هۊرچنیەی هەن، بەڵام سەرەنج دەیدۍ کوردسانەنە سیاسەتوو جەنگی ملۆڕاوە، دەوڵەتوو تورکیای گەرەکشا ئیرادەو گەلوو کوردی ماڕۆ، گەرەکشا تەسلیمۍ با و پاگیری سەروو مافەکاشا نەکەرا.
مدرامانوو گلێرگەو کوردی پۍ ئانەی نییا دەرفەتما بۆ کە جە بڕۍ مەنتیقێنە شارەوانیما بۆ. گەلوو کوردی گەلێوە چانە نییا شۊنەو ئی جۆرە دەرفەتارە بۆ. نەخێر، بەڵکووم ئاگاڎاروو جەنگی جە دژوو ۋێشا. ڕووانە هجوم و جەنگی تایبەتی نۆعاو نۆعی پۍ ماڕای ئیرادەو گەلوو کوردی ملۊڕاوە. گێرتەی هەن.کە دەرفەت موینا کۆکوشی ئەنجام مڎا. جە ۋەرا ۋەروو ئینەیچەنە جە هۊرچنیەکانە هەڵوێسەکۍ دیاری کریێنۍ.
ئەندامەو کۆمیتەو ناوەندی پەکەکەی، هێلین ئومیتە، واتش: "گرنگا گەلوو کوردی جە گرڎ یاگێنە خاوەن ئیرادەو ۋێش و بەپاو مەسڵەحەتەکا ۋێش کۊشیۊنە واتە گلێرگەی کوردی مشۊم سەروو ئی بنەمایۍ هەڵسوکەوت کەرۆ، چونکی پەنەوازش بە کۊشیا چانەی هەن. گەلوو کوردی گلێرگێوە وەهارییا، گلێرگێوە نەورۆزییا. بە پەیلواو من ئینە کاریگەریش سەروو هۊرچنیەیچ بۆ."
٥٢ەمین نەورۆزوو ڕابەرایەتین
هێلین ئومیتە ماچۆ، جەژنەو مدرامانوو نەورۆزی، وەڵینگێوە دوور و درێژش پۍ کوردی هەن و واتش: "بەڵام پی زووانە ٥٢ەمین نەورۆزوو ڕابەرایەتی مێنە وەرۆ جە ڕۆو نەورۆزینە کۊشیایش پۍ بیەی و ئازاڎیی دەسپنەکەرد" گەلوو کوردسانیچ پەشتیش پا کۊشیایە بەست و نەورۆز بە ماناڎارتەر بیۆ، جە حەقەتینەنە نەورۆز فاڕیا پۍ ڕووێوە چارەنوویسسازی کە گەلوو کوردی بیەی و ئازاڎیی ۋێش دلێنە ویناوە، سەروو ئی بنەمایۍ بی بە یانەو گرڎوو گەلا مەنتیقەکەی، نەورۆزوو کوردی بە مەعناو ڕووێوە تازەیا.
ۋەڵۍ گرڎ چێوێنە، داوا کەروو گەلوو کوردی، گرڎوو ئانیشا کە جە نەورۆزوو ئێساڵینە بەشداری کەرا بە ئەنەیاوای جە نەورۆزی پۍ ئازاڎیی و دیموکراسی، ۋێشا تازە کەراوە و بە جۆش و خرۆشێوە فرۆ جەنگوو فاشیزمی بیاونا بە قولەپۊپە. سەروو ئا بنەمایۍ داوا جە گرڎ لێوە کەروو بەشداری جە جەژنەو نەورۆزینە بکەرا. مشۊم دەنگوو کوردی جارێوەتەر چی نەورۆزەنە کاریگەری برمانۆ و سەرانسەروو جەهانینە دەنگبڎۆوە."
