ئادا: ئېمەیچ چنی ڕۆڵە زینڎانیکریاکاما مدرامان کەرمۍ
ڕەشاهات ئادا واڵۍ گۊرۍ یۆ جە زینڎانیا مانگرتەی، حەمدوسەنا ئادا ئەرەیاۋناش، تا گۆشەگیری هۊرنەگیریۆ، ڕۆڵەکېما زینڎانەکانە و ئێمەیچ جە چوار پارچەو کوردسانینە بەردەوامۍ بیمۍ جە مدرامانی.
حەمدوسەنا ئادا، کە جە زینڎانی ژمارە ١و ئاسایشوو باڵاو ئامەدینە دەسش بە مانگرتەی جە وارڎەی کەرڎەن، ساڵەو ٢٠١١ مەنتیقەو لجێی ئامەڎینە بە تۆمەتەو "ئەندامێتی جە ڕېکوزیاینە" گیریا. دماو گېرتەیش، فاڕیېنۆ پۍ زینڎانی ڕیزەی. جە ئاکاموو حۊڵ و داواکارییەکا، دیسان فاڕیێنۊ زینڎانوو ئامەڎیی. ڕەشاهات ئادایەی واڵېش باسش ئەو مانگرتەی جە وارڎەی زینڎانیا کەرڎ. ئادا ۋیرش ئارڎۆ بەمەبەسوو سەرنج کېشتەی پۍ ئاژەو زینڎانیا نەوەشی، ئەشکەنجەدای و مردنای مافەکا، ١٤ مانگۍ "ئێشکگیریی داڎپەروەری"شا بەرڎەن ڕاوە.
"ڕۆڵەکېما پۍ گەلی و ئشناسنامەیشا کۊشیای کەرا "
ئادا ڕۊشنشکەرڎۆ کە ڕۆڵەکېشا پۍ گەلی و ئشناسنامەیشا کۊشیای کەرا و ماچۆ:"هەرمانېوە خراپەشا نەکەرڎېنە". ڕۆڵەکېما پۍ ئی خاکیە گیانشا فیدا کەرڎ. دماو ئانەی براکەم زینڎانی کریا، دوورشا وستۆ پۍ ڕیزەی. مودېوە فرە چا مەنۆ. جە ئاکاموو حۊلېوە فرەینە ڕەوانەو ئامەڎی کریاوە. زینڎانەنە ئەشکەنجە مڎریا، ئی هەڵسوکۊتېما قبووڵۍ نییەنۍ. پەشتیوانی جە کۊشیای مافوو ڕۆڵەکاما کەرمۍ. مشۊم دمایی بە ئەشکەنجە و گۆشەگیری بارمېنە."
"پۍ ئانەی بژیۋاو ژیۋای بەخشا مدرامان کەرا"
ئادا باسوو ئانەیش کەرڎ، وەڵۍ دەسپنەکەرڎەو مانگرتەکەینە، دیڎارش چنی براکەیش جە زینڎانەنە ئەنجامدان و ماچۆ:" براکەم واتش کە پۍ ماڕای گۆشەگیریی سەروو ڕابەر ئاپۆی دەس بە مانگرتەی جە وارڎەی کەرا، ورەشا بەرزبۍ و ۋېڕاگری کەرا، پۍ ئانەی بژیۋاو ژیۋای بەخشا مدرامان کەرا. ئێمە گەرەکمانە گرڎ لایۍ پەشتگیری ئی مدرامانەیە کەرا. تا گۆشەگیری هۊرنەگیریۆ ڕۆڵەکېما جە زینڎانەکانە و ئێمەیچ جە چوار پارچەو کوردسانینە مدرامان کەرمۍ. من داواکەروو گرڎ لایۍ پەشتگیری جە مدرامانوو زینڎانیا کەرمۍ."
