ئامەدەنە بە بەشداری نوێنەراو پارتە سیاسییە کوردەسانیەکا، ڕێکوزیا مەدەنییەکا گلېرگەی، ڕیش چەرمۍ، باوەڕمەندا، کەسایەتیۍ، پەرلەمانتارا بە مەبەسو ئەرەیاۋنای 'دەسوەڵێوستەی یۊبیەی' جە کەلتووری ئامەدینە گلېرۊبیەیشا کەرڎ. گلېرۊبیەکەی ئارۆ دەسش پنەکەرڎ تا سەبای بەردەوام بۆ. هامسەرۆکو گرڎیی دەبەپەی کەسکین بایندەر، نوێنەرۍ و ڕاوەبەرا پارتە کوردەسانیەکۍ، ڕێکوزیا مەدەنییەکۍ، کەسایەتیۍ و چڼین کەسۍ بەشدارۍ بێنۍ. جە تەلارەکېنە بە زاراوەکا کورمانجی و زازاکی کوردی، تورکی، عەرەبی، سوریانی و ئەرمەنی لافیتۍ "بە هەڵوێسو یۊبیەی سەرۍ گنمۍ" هۊرواسیۍ.

گلېرۊبیەکەی بە دەیەقێوە ڕێزگېرتەی جە گەشمەرڎا ئازادی کوردەسانی دەسش پنەکەرڎ. ساڵیحە ئایدەنیزە، دیبا کەسکین، ناهیت ئەرەن، کازم فورات و ئایەتوڵا ئاشتی پەی دیوانەکەی هۊرچنیۍ.

دماتەر یۆ جە ئەنداماو دەسوەڵێوستەکەی ئۆرهان ئایاز قسێش کەرڎۍ و پېوەس پا پڕۆسەی دماو بانگەوازەکەو ڕابەر ئاپۆی دەسش پنەکەرڎ هۊرسەنگنایش کەرد و داواش کەرڎ پاڵپەشتی ئی پڕۆسەیە بکریۆ و واتش: "چەمۍ تەمامو کوردەسانی و جەهانی ئینۍ سەرو گلېرۊبیەکەیماوە. ئێمەیچ سەرو ئی بنەمایۍ گلېرۊبیەکەیما ئەنجام مڎەیمۍ."

هەرپاسە جە بەردەوامی قسەکاو گلېرۊبیەکەینە ئەندام پەرلەمانەو دەم پارتی مێردین ساڵیحە ئایدەنیزە باسو ئەوەکۊشا سری سورەیا ئۆندەریش کەرد و سەرنجش وست سەرو بانگەوازو "ئاشتی و گلېرگەی دیموکراتیک"ی ڕابەر ئاپۆی و واتش: "پەی ئانەی ئی بانگەوازە بە مەرام بیاوۆ ئەوەکۊشای ڕاوەبەر مکەرمۍ. جە سەرنیشتوو کوردەسانی و تورکیای یۊبیەی ۋێما بارمۍ دی. یۊبیەی جە هەر چوار بەشو کوردەسانی و سووریا، ئێران، عێراق و تورکیاینە دیموکراسی وەڵۍ وزۆ. گەلو کوردی پەی ئازادی ئەوەکۊشای مکەرۆ و پەی دیموکراسی هەمیشەیی مشۊم ئەوەکۊشمۍ."

جە دمادمایی قسەکاشەنە ساڵیحە ئاماژەش بە کۆنگرەو پەکەکەی جە ٥-٧ ئایاری کەرد و واتش: "مشۊم ژەنا، جوانا و گلېرگەی زیاتەر بە دەورو ۋێشا هۊربێزا. ۋەرو ئی مەڵامەتە تاریخیا مشۊم ۋەرپرسیاری ۋێما جابەجێ بکەرمۍ. سوپاسو گرڎو ئا کەسا مکەرمۍ جە ئەرەمەرزنای ئی دەسوەڵێوستەینە ڕەنج مڎا."

دماتەر پەرلەمانتارو دەم پارتی وانی سینان چیفتیورەک قسێش کەرڎۍ و ئاماژەش بە پێشئامایەکا ۋەرکۊتوو مېیامینی کەرد و واتش: "دۊڵەت چنی ئېژا ئۆجالانی گلېرۊبیەیش کەرڎ. ئی گلېرۊبیەی پەی چارەسەرکەردەی پرسو کوردی هومېڎێوەش ئارڎ ئاراوە. ئېژا ئۆجالان پەی چارەسەرکەردەی پرسو کوردی و دیموکراتیکبیەی گلېرگەی بانگەوازش کەرد. پېسە دەسوەڵێوستەی ئی بانگەوازەیە بە گرنگ موینمۍ. بانگەواز جە گەلەکەیما مکەرمۍ پەی چارەسەر کەردەی پرسو کوردی، زوانی کوردی بۆ بە زوانی فەرمی و پەروەردەی و پەی ئاشتیی هەمیشەیی و گلېرگەی دیموکراتیکی پاڵپەشتی دەسوەڵێوستەی یۊبیەی بکەرا." 

جە دمادمایی قسەکاشەنە سینان چیفتیورەک واتش: "کۆنفرانسێوە گرنگ جە ۋەرنیشتوو کوردەسانینە ئەنجام دریا. ئینە پەی هەر چوار بەشو کوردەسانی و سەرانسەرو سووریای گرنگ بۍ، قەراری گرنگ دریا. واتشا کورد یەک دەنگا. هیواڎەرەنا ئی دەسوەڵێوستەیە چۍ قەرارێوە عال گێرۆ و ڕاما پەی بکەرۊوە." 

دماو قسەکا گلېرۊبیەکەی بەبێ ئەرەیاۋنای بەردەوامبی.