ئامەدنە دژوو قەرارەکاو دۆزوو کۆبانێ چالاکیی "کۆبییەیوەی ئازادی و دادپەروەری" بە سەرمەشقیی پارتوو یەکسانی و دیموکراسیی گەلا (دەم پارتی) و پارتوو هەرێمە دیموکراتیکەکا (دەبەپە) و تەڤگەروو ژەنە ئازادا (تەژەئا)ی کریا.

هامسەرۆکە گردینەکاو دەبەپە چیدەم کلچگون ئوچار و کەسکین بایندەر، هامسەرۆکوو دەم پارتی تولای حاتەم ئۆغۆللاری بەشدارێ بێنێ، چالاکێ وەردەموو بیناو دەبەپەینە کوێ بیێوە، ڕسمێ سیاسەتمەدارا و درووشمێ و هەلهەلێشا واتێ و بەرزێ کەردێوە. 

پۆلیس هەوڵێش دێ ڕاگێری وەنەو ڕاپیمایەکەی بکەرۆ، بەڵام جەماوەر سەرەڕاو قۆرتەکاو پۆلیسی دەسشا کەرد بە ڕاپیمای، جادەو وێستگەینە کە داعش ٥ و حوزەیرانوو ٢٠١٥ هجوومش چنە کەردەبێ دمایییش ئاما.

تولای حاتەم ئۆغۆللارییە چالاکییەکەنە واتش قەرارەکێ سیاسییێنێ و کۆشکەو ئەردۆگانینە و هامبەشاکاشۆ بەرێشیێنێ، دۆزوو هەقۆسانای جە هەدەپەی و بندەسا و گەلوو کوردین، ئەوەخوایش کەردۆ ئاکەپە-مەهەپە گەرەکشابێ سەرەما پەنە بکۆمنارە و واتش: "بەڵام ئێمە ئامەدنە واوەی وەعد مدەیمێ، پاشەکشێ جە کۆشیای نمەکەرمێ. شانە بە شانە درێژە بە کۆشیای گەلوو کوردی مدەیمێ".

حاتەم ئۆغۆللارییە ئاماژەش پانەیە کەرد جە ساڵەو ٢٠١٥ینە هەمان یاگێنە هەدەپە کۆبییۆ و ڕا پەی هجوومی و تەقایوەی داعشی چی یاگێنە کریاوە، واتش: "ئانێ تورکیانە و وەرکەوتوو دلێراسەینە ڕاشا پەی داعشی وەشە کەردە، ڕوێو چێ دادگایی مکریانێ. ئێمە سەرەبەرزێنمێ دژوو داعشی کۆشیێنمێ. ئێمە مدرامانوو داعشینە ڕاما بە داعشی نەدا و هەرگیز ڕاشا پەنە نمەدەیمێ ".

حاتەم ئۆغۆللارییە واتش کۆکوشییەکەو داعشی وەرەچەماو دەسەڵاتی و میتیوە کریا و ئەرەیاوناش: "ئێمەیچ یاگێ کۆکوشییەکەینە کەمپەینەکەما کەرد. ملمێ ئا یاگا کۆکییەکەشا چنە کریان و یادشا مکەرمێوە. ئێمە دژوو کۆکوشکەرەکا کۆشیایمێ پەوکای دۆزوو کۆبانێشا ئامادە کەرد. داعش یوەم جار کۆبانێنە شکسش ئارد، گردوو جیهانی خاوەندارییش وەنەو ئی مدرامانەیە کەرد، حەر جە تورکیاوە و وەرکەوتوو دلێڕاسەیوە، مدرامانەکە تەماموو جیهانینە دەنگش داوە".