رابەروو گەلوو کوردی عەبدوڵا ئۆجالان کە ٢٥ ساڵێن جە زینڎانی ئیمراڵینە هەلومەرجۍ دژوارەنە گۆشەگیرکریان، ماوەو ٣٨ مانگان بە هیچ جۆرێوە زانیاری جە بارەشۆ هۊرمەگیریۆ.

جە ١٠/ ١٠ /  ٢٠٢٣ێوە سەروو ئاستی میان نەتەوەیینە هەڵمەتەو 'ئازاڎیی پەی ئۆجالانی، چارەسەری سیاسی پەی پرسوو کوردی' ملۆڕاوە. ئا کەسایەتیۍ داواو ئازاڎیی جەستەیی عەبدوڵا ئۆجالانی مکەرا، تا مۍ توڕەییشا ۋەرا ۋەر بە گۆشەگیری زیاتەر بۆ. پارێزنەری نەرویجی بێنت ئەندرێسێن سەبارەڎ بە گۆشەگیری ئیمراڵی قسێش پەی ئاژانسوو هەواڵوو فوراتی (ANF)ی کەردۍ.

پارێزنەر بنێت ئەندرێسێن ئانەش وست ڕووە کە چنڎین ساڵێن سەروو پرسوو کوردی کارش کەردەن و فرەو وەختی سەردای تورکیایش کەردەن، "ئاگاڎاروو هەلومەرجوو گۆشەگیری هەنا کە عەبدوڵا ئۆجالانش ئینا چنە. هەلومەرجێوە کە بە تەمامی نایاساییا. جە پرسوو گۆشەگیرینە فرەو مژارا هەنۍ کە ئینسان باسشا چۆوە مکەرۆ. ئا هەلومەرجەی ئۆجالانش ئینا چنە وەڵۍ گرڎ چێوێنە دژوو یاسێن و ئشیۍ فرە زووتەر هۊرسەنگیۍ".

ئەوروپا بە مەڵامەتوو سات و سەودایۆ بێدەنگا

پارێزنەری نەرویجی بێنت ئەندرێسێن واتش، " جە پرسوو هەلومەرجوو ڕاگێرتەی ئۆجالانینە پرسی سەرەکی ئانەن کە مشۊم چێش بکریۆ"و پی جۆرە بەردەوام بی: "ئا مژارە پەیوەس بە حۊڵەکا پەی زینڎانیا سیاسی جە تورکیانە، چ جە زینڎانەکا جۆروو ئێفی، چ جە زینڎانەکا جۆروو ئێسی. هەلومەرجوو ڕگێرتەی زینڎانیا حەجگیز مایۍ قبوڵ کەردەی نییا".

ئەندرێسێن واتش "کۆڕ و کۆمەڵ و رێکوزیاکا ئەوروپای هیچ چێوۍ پێویس مەکەرا پەی ئا کەسا کە جە تورکیانە رووبەڕوو دژواری و تەنگوچەڵەمەی باوە. پرسیارەی ئەساسیە ئانێنە کە ئەوروپا پەی چی هەڵوێسێوە پی جۆریە گێرۊنە ۋەر؟ ئێمە مەڵامەتەکەیش مزانمۍ. بەمەڵامەتوو سیاسەتوو پەنابەریوە ۋنەپەرسای جە تورکیای مەکەرا. جە چوارچێوەو سات و سەودا و بازرگانینە ڕا بە کردەوەکا تورکیای مڎا".

پارێزنەر ئەندرێسێن ئانەش وست ڕووە کە جە ماوەی ۋییەردەنە ژمارێوە فرە ئینسانۍ جە ۋەرا ۋەروو قۊرتەکانە ۋەرپرسیارانە جماوە و ئانەش وات: "جە ۋەرا ۋەروو قڕکەردەینە جە غەززە جموجوڵێوە چڕی سیاسی ئینا ئارانە. بە بڕواو من ئانە جمیەرێوەن کە بۊنەو کەسا چەوەسیای کۊشیای دادپەروەری بەردەواما. من پەشتیوانی جە زینڎانیا سیاسی جە تورکیانە و گەلوو کوردی مکەروو کە جە کوردسانەنە رووبەڕوو فشاری بیێنێوە. کردەوەکۍ ۋەرا ۋەر بە ئۆجالانی نمونێوە فشارینۍ پەی سەروو کوردی".