فەرماندەیی گرڎیی یەکینەکاو پارېزنای گەلی (یەپەگە)، بۆنەو ١٣ەمین ساڵوەگەڕو شۆڕشو ١٩و تەممووزیۆ، بەیاننامێوەش وەڵاکەرڎۆ.

بەیاننامەکەو یەپەگەی پی جۆرەنە:

"بەنامې فەرماندەیی گرڎیی یەپەگەیۆ بە جۆش و سەرفرازیۆ مبارەکبایی ١٣ەمین ساڵوەگەڕو شۆڕشو ۋەرنیشتی جە گرڎو گەلا سەرنیشت و ۋەرکۊتوو سووریای، بنەیانەو گەشمەرڎا و تەمامو جەهانی مکەرمې، ١٩و تەمووزی هێماو مڎرامانی و ئازادیی گەلەکەیمانە کە ڕاش پەی قۆناغێوە تازەی جە تاریخو کورڎەسانی، سووریا و ۋەرکۊتوو مېیامینینە کەرڎۆ.

بە شکۆوە یاڎو گرڎو ئا گەشمەرڎا مکەرمېوە کە پەی پارێزنای شۆڕشی گیانو ۋێشا بەخشا. مڎرامانوو گەلەکەیما، هێزەکې یەپەگەی و یەپەژەی جە دژو داعشی و هێزە ئەرەگیرەکا بیەن بە نموونەو قارەمانیێوە کە نەک تەنیا ناوچەکەش پارېزنا بەڵکم کاریگەریش سەرو ئەمنیەتو جەهانیچ بې.

شۆڕشو ۋەرنیشتی، جە ساڵۊو ٢٠١٢یۆ، بە ڕەنجو دەیان هەزار شۆڕشگێڵنا جە گرڎو بەشەکا کورڎەسانی و گەلا سووریای و شۆڕشگێڵنا گرڎو جەهانی، خەسڵەتێوە ئینتەرناسیۆنالیستیش بەدەسئاوردەن و نیشانەش دان کە ئیرادەو گەلی سەرو ستەمیرە سەر گنۆ. ئی شۆڕشە بە سەرمەشقایەتی ژەنا و جوانا بیەن بە تروسکەو هیوای پەی گرڎو گەلا ناوچەکەی. ئارۆ ۋەرنیشت جە سەرانسەرو جەهانینە پېسە مۆدێلێوە دیموکراسی ئشناسیان کە سەرو یەکسانی و پېورە ژیۋای ئاشتییانەی بنیاڎ نریان. ئێمە سەلەمناما پێوەرەژیۋای گەلا جە ۋەرکۊتوو مېیامینینە مومکینە. جە ساڵوەگەڕو شۆڕشەکەیمانە، گرڎو ناوچەکەیما و سووریا بە تایبەتی بە ئاژێوە سەخت و پەڕ جە ملەملانێرە موېیەرۆ. ئەسرارش مکەرمېوە کە هیچ هەوڵێوە ئیداری یان جمېیەرێوە سیاسی کە ڕێز جە فرەچەشنی و فرە کولتووریی ناوچەکەی نەگێرۆ ئانە نمەتاوۆ بە سەرکۊتەی دمایی بە جەنگی ١٤ ساڵەو دلېینەی بارۆ. سەرچەمەو قەیرانو ١٤ ساڵەو سووریای، ئا ئاوەزیەتە پاوانوازە بې کە تاک ڕەنگی و تاک دەنگیش سەرو گەلو سووریایرە سەپنا. ئارۊیچ هەمان غەڵەت قەیرانێوە گۊرەتەرەش شۊنەو ۋێشەرە ئارڎ.

جە یاڎو ١٣ ساڵەو شۆڕشەکەیمانە، قەول مڎەیمې جە ئەوەکۊشای پەی ئازادی و دادپەروەری بەردەوامې بیمې و ئەرەیاۋنمېش کە هێزەکېما بەردەوامې با جە ئەوەکۊشای دژو گرڎو هەڕەشې و مەترسییەکا جە دژو گەلی و شۆڕشەکەیما."