گێرتەی، تیرۆکەردەی و بێسەروشۆنکەردەیی ڕۆنامەنویسا پانیشتوو کوردستانینە بەتایبەتی سەروو دەسوو پەدەکەیوە، تارێخێوی هێندەو قەوارەو هەرێموو پانیشتوو کوردستانییوە هەن و یوەم ڕۆنامەنویسیچ کە تیرۆر کریا ڕەئوف ئاکرەیی بێ.
دماو ئەرەپرای یوەمین زەنگوو بێدەنگکەردەی ڕۆنامەنویسا بە تیرۆرکەردەی "ڕەئوف ئاکرێیی" داش وەنە و زنجیریوی تیرۆرێش شۆنەو وێشەرە ئاردێ، دماو ٣١ ساڵا هامپیشەکاو ئاکرێی هەڵای مڕفانییا و موزیانێ کونجوو زیندانەکاوە و هەوڵێ بێدەنگکەردەیشا مدریۆ. .
ئارۆ، ساڵیادوو تیرۆرکەردەی نویسەر، ڕۆنامەنویس و چالاک "ڕەئوف ئاکرێی"ین، کە شەوەو ٢٦ـوو ئایاروو ١٩٩٣ وەردەموو یانەکەو وێشنە شاروو دهۆکینە تیرۆر کریا.
ڕەئوف کامیل ئاکرێیی نویسەر، ڕۆنامەنویس و چالاک، ساڵەو ١٩٥١ شارەکڵەو ئاکرێنە پەیدا بییەن، ئەوەڵوو خەباتیش دلێ ڕیزەکاو یۆبییەی وانیاراو کوردستانینە دەسش پەنە کەردەن، دمایی کۆمەڵەو وانیاراش ئەرەمەرزنان و دما وێستگەو خەباتی وانیاریش دلێ "یۆبییەی وانیارە شۆڕشگێڵنا کوردستانی"نە بییەن، کە حەر وێش ئەرەمەرزنەرش بییەن.
ئاکرێی ساڵەو ١٩٧٥ وەختێوەنە کە هەڵای وانیارا، چەنی کۆمەڵێو جە ڕۆشنویرا بەشدارییش کەردەن، جە ئەرەمەرزنای پارتوو کرێکارا و ڕەنجدەراو کوردستانینە و ساڵەو ١٩٧٨ بۆنەو هەستە نیشتیمانپەروەرییەکەیشوە شۆنەو هەرمانەکێش ئەوەفاڕێنە پەی ڕاوەبەرایەتیی ئاماروو تکریتی، ئادیچ پێسەو هەڵوێستێو وازش جە هەرمانەکێش ئارد و دەسش کەرد بە کرێکاری.
ڕەئوف ئاکرێیی ساڵەو ١٩٨٤ ڕێکوزیاو "کۆشیای ڕەنجدەراو کوردستان"ـیش ئەرەمەرزنا و سەرنویسەروو ڕۆنامەو ڕاو ڕەنجدەرا بێ، كە بە هەردووە زوانی كوردی و عەرەبی بەرشێ، هاموەخت ساعیبوو چند کتێبێوەن، شۆڕشگێلنێوی بە دیسپلین و ویرمەندێوی پابەند بییەن بە ویروباوەڕەكاشوە پەی خەباتكەردەی پەی كرێكارا و ڕەنجدەرا.
ڕەئوف ئاکرێیی ساڵەو ١٩٨٧ بییەن پێشمەرگە مەنتێقەو بادینانینە، خەباتی چەکداریی ئاکرێیی دوور جە هەردووە حزبی 'پەدەکە و یەنەکە' بییەن و هەوڵێ پارێزنای سەربەوێیش دان، دماو ئەرەپڕای هەرمانەش پەی یۆوستەی هێزە مارکسی و ڕێکوزیا کرێکارییەکاو پانیشتوو کوردستانی کەردەن.
ڕۆنامەنویس ڕەئوف ئاکرێیی ساڵەو ١٩٩٢،سەرمەشقایەتی وێنیشاندای وەرفراوانوو هەولێریش کرد دژ بە هجوومەکاو سوپاو تورکیای پەی سەروو شرناخ-وو سەرنیشتوو کوردستانی، چا چنی ١٢ کەسای تەری گیریا و پەی ماوەو شش مانگا کریا زیندان، کە بە یوەمین زیندانیی سیاسیی دماو ئەرەپڕای، هەژمار مکریانێ.
خەباتوو ڕەئوف ئاکرێیی تەنیا پانیشتوو کوردستانینە سنووردار نەبێ، بەڵکوم هەرمانەش پەی دماییئاردەی بە ناکۆکیی لایەنەکاو حەر چوارپارچەو کوردستانی کەردەن و هەوڵێ یۆگێرتەیش دێنێ.
ڕەئوف ئاکرێیی ساڵەو ١٩٩٢ چەنی چند هامڕێوەش لوان ئەکادیمیاو مەعسوم کۆرکمازیوە بیقاع و چەمشا بە ڕابەروو گەلوو کوردی عەبدوڵا ئۆجالانی کەوتەن، ئامانجوو سەردایەکەیشا دماییئاردەی بییەن بە گرژییەکاو بەینوو پەکەکەی و 'یەنەکە و پەدەکە'ی، کە وەڵێنیارەکاو ڕابەروو گەلوو کوردیشا ئاردێنێوە پەی وەرپرساو ئا دووە حزبا، بەڵام گۆششا پەی نەگێرتێنێ.
شەوەو ٢٦ سەروو ٢٧ـوو ئایاروو ١٩٩٣، شاروو دهۆکینە و وەردەموو یانەکەیشنە، ڕۆنامەنویس و چالاكوی سیاسیی (ڕەئوف كامل ئاكرێیی) چند چەكدارێوە تیرۆر کەرد، تا ئیساتێچ هیچ كەسێو بە تۆمەتوو ئا تیرۆرەیە نەگیریان.
گەشمەردەکەردەیی ڕەئوف ئاکرەیی یوەمین تیرۆرو ڕۆنامەنویساو پانیشتوو کوردستانی بێ دماو ئەرەپڕای، دماییچ عەبدولستار تاهیر شەریف، سەردەشت عوسمان، کاوە گەرمیانی، وەدات حسێن، سۆرانوو مامەحەمەی، شوکری زەینەدین، تیرۆرێ کریێ.
دماو ٣١ ساڵا و زنجیرێوە جە تیرۆرو ڕۆنامەنویسا، هەڵای هەوڵێ بێدەنگکەردەی ڕۆنامەنویسا و چالاکا بەردەواما و ساڵەو ٢٠٢٠ـینە پەدەکە زیاتەر جە ٨٠ ڕۆنامەنویس، چالاکاو بادینانیش گێرتێنێ و بەشێوەشا هەڵای ئینێ زیندانەکانە.
لە ٢٥ـوو تشرینوو یوەموو ساڵێ وەڵینێچوە، پەدەکە سلێمان ئەحمەد، ڕۆنامەنویس و هەواڵسازوو بەشوو عەرەبیی ئاژانسەکەیماش بەبێ هیچ هۆکارێو دەروازەو فیشخابوورینە گێرتەن و دماو ٢١١ ڕوا ڕاش دا بە سەردای پارێزنەرا و کەردەی تەلەفۆنیی چن خێزانەکەیش، وەختێونە سلێمان ئەحمەد پەی بەشداریکەردەی پەرسەو تاتەیش سەرێ وەرنیشتوو کوردستانیش دابێ.
