جەمەو مافەکاو مرۆڤی (ئیهەدە) پەی کیاستەو شاندێوە پۍ زینڎانی ئاسایشوو باڵاو تیپ و F ی ئیمراڵینە، سەردای وەزارەتوو داڎوو تورکیایش کەرڎ.

جە داواکاریەکەو ئیهەدەینە پۍ وەزارەتوو داڎی، ئاماژە پانەی کریان چنڎین داواکاریۍ پێشکەش بە کۆمەڵەکەی کریېنۍ، پەیوەس بە ڕاگېرتەی جە دیڎاروو بنەیانە و پارێزنەرا چنی ڕابەروو گەلوو کوردی عەبدوڵا ئۆجالانی، زینڎانی حامیلی یەڵدرم، عومەر خەیری کۆنار و وەیسی ئاکتاشی جە زینڎانی ئیمراڵی. وچیان: " ئانۍ داواکاریشا پێشکەش بە ئەرەمەرزیاکەی کەرڎەن تەئکیدشا کەرڎەنۊ، بنەیانە و پارێزنەر و کەسوکار و موەکیل و ئا کەسا پېسە حکومدریای جە ئەرمەرزیاکەنە ڕاگیریېنۍ، زانیاریشا دەس مەگنۆ، جە ئەرەمەرزیاکەنە گۆشەگیریېوە تن هەن و گەرەکشابۍ بە شاندێوە سەربەخۆ بلانۍ ئەرەمەرزیاو زینڎانوو تیپوو Fی جە ئەمنیەت و باڵاو ئیمراڵی. چنی ئانەیچ، زینڎانیاو ئەرەمەرزیا جیاجیاکاو سزادای پېخامشا پۍ جەمەکەیما کیاستەن و ئەرەیاۋنانشا، بەمەڵامەتوو نەبیەی زانیاری سەبارەت بە عەبدوڵا ئۆجالانی، دەسشا بە مانگرتەی جە وارڎەی کەرڎەن".

با شاندێوە سەربەخۆ بلۆ ئیمراڵی

حەرپاسە وچیان: "جەمەکېما بە ڕای جیاواز و چنڎین جارۍ ئەرەیاۋنانش، زینڎانی تاکەکەسی گۆشەگیریېوە سەختا، ئی ئاژە پاشێلکەردەی مافە گەردوونییەکاو مرۆڤیا، پێچەوانەو مافوو حکومدریایا و پیمەرەکاو زینڎانیا کە ئەنجوومەنوو ئەوروپای و نەتەوە یۊگېرتەکا دەسنیشانشا کەردەن.  ۋەروو ئا مەڵامەتا سەرۆ ئاماژەما پنەدۍ، حەرپاسە بەپاو بانگەشەو داواکارا، بە زەروورش مزانمۍ شاندێوە سەربەخۆ و بێلایەن ئاماڎە کریۊ و سەردای ئەرەمەرزیاو سزادای ئاسایش و باڵاو تیپوو F ی جە ئیمراڵینە کەرۊ. پۊکەی داوا کەرمۍ ئیجازە پا شاندەو جەمەو مافەکاو مرۆڤی بڎریۆ تا سەردای زینڎانوو ئیمراڵی کەرۆ".