ژەنە چالاکۍ کوردە سزاو ٢١ ساڵا زینڎانیش سەرەرە سەپیا
دادگاو شۆڕشوو ئیسلامی شارو سنەینە سزاو ٢١ ساڵا زینڎانیش سەروو ژینا مودەڕس گورجیۍ رۆنامەنوویسێ و چالاکەو بوارو مافەکا ژەنارە سەپنا.
لقوو یەک و دادگاو شۆڕشوو ئیسلامی ئێرانی شاروو سنەو ۋەرکەوتوو کوردسانینە قەراروو ۋێش جە بارەو دۆسیەو ژینا مودەڕس گورجیۍ بە پارێزنەراش ئەرەیاۋنا.
بە پاو ئا قەراریە بە تۆمەتەو 'پێکئاوردەی دەسە و گروپی نایاسایی بە مەبەسوو وڕنای دەسەڵاتی' سزاو ١٠ ساڵا زینڎانی بە تۆمەتەو 'هامکاری چنی گروپ و دەوڵەتا دژبەری' سزاو ١٠ ساڵا تەری بە تۆمەتوو 'بانگەشە دژوو دەسەڵات'ی سزاو ساڵێوە زینڎانیش سەروو ژینا مودەڕس گورجیێرە سەپیان.
حەرپاسە دادگا قەرارش دان کە ئا ژەنە چالاکۍ ماوەو سزاکێش جە زینڎانوو هەمەدانینە تەمام بکەرۆ.
ژینا مودەڕس گورجیە جە سەرەتاو دەسپنەکەردەو سەرهۆردای ژەنی، ژیۋای، ئازاڎیی جارێوە و جە مانگەو نیسانوو ٢٠٢٣ێچ پەی جاری دووەمی جە تەرەفوو هێزە ئەمنییەکاوە گیریۍ بۍ. جە ماوەکا ۋییەردەیچەنە بە بەهانۍ رەچاونەکەردەی حیجابی زۆرەملێوە، دوکانوو کتێب ورەشیەکەیش جە شارو سنەینە جە تەرەفوو هێزە ئەمنییەکاوە وزیابێرە.
