ئیمە خاون ئمزال هوارە، ئەژ سەر بناوا ئە پرنسیپ و گامەلە ک ڤەئیرە هەتنە، داوا یەکگرتن و یەکڕێزی ڤە حزبەل و ڕێکخراوەل سیاسی کوردستانە مەکەیمن. حاڵ و هەرەنگ ئێسکەی کوردستان و ئێران، پیچ چارەنۊسسازێ نیاسە ڤەردەم گەل کورد و جمشتێ ڕزگارخوازی ڕوژهەڵات.

گرێمان گوەڕیاین بناوایی ڤە ڕوژهەڵات، ڤەرپرسایەتیی مێژوویێک ئەڕا گشت حزبەل ڕوژهەڵات دروس کردێیەسێ تا هامگام بین وژیان ئەڕا داشتن ئستراتژی هامبەش ڤەسەر بڕێک بناوا و خاڵ سەرەکی بگرنە ڤەرچەم. کومار ئسڵامی هەقاتی سیستمێک تۆتالیتر هایتێر ڤە بوونە ڤەرڤەڵایی ناڕەزایەتی و دەس ئەر کار کیشانێنەل گشتی مەردم، ڤە ناکاو بنیشێیە زرانی. هەر ئە جوورە ڕمیاین ڕژیم کومار ئسڵامی بێگومان دەرفەت زەڕینێکە ئەڕا نەتەوەی کورد گ سەروەری سیاسی ئەڕان وژ بارێدەر دی.

ڤە گریمان تۊچیاین دەسگای ئەمنییەتی دئوڵەت داگیرکەر ڤە کوردستان، هەم ڤە بوونە زەمانەت حەق سەروەری ئەڕا نەتەوەی کورد و هەم ئەڕان کلیل کوڵوم کردن ئاسایش نیشتمانی هام ڤڵاتیەل، هێز و رێکخراوەل سیاسی ڕۆژهەڵات ڤەرپرسایەتی ئەخڵاقی و نەتەوەییان هەس. ڤە بوونە ئی هالی مەنێن و نێڤین یەکگرتن سەقامدار ڤە نامجا هێز و ڕێکخراوەل کوردستان ئمکان دێرێ ئازمون تەڵ باشوور کوردستان دووجارە بووتێ. یەکگرتن سەقامدار ڤە ڕوژهەڵات ئێ سەر بنەمای پڵاتفۆرمێک نیشتمانی، هەمیشە هەڤەجە بییە، ئەمان ڤەی بارودووخە یەکگرتن هەڤەجەی نەتەوەیی و داواکاری گشتیێکە.

ڤەی باوەتە کول حزبەل و ڕێکخراوەل سیاسی ڕۆژهەڵات کوردستان دەنگە مەکەیمن ک ئەژ سەر ئی بنەمالە، ئەڕان یەکگرتن دامازریای نەتەوەیی ک دەنگدانەوەی ئی فرە ڕەنگی ڕوژهەڵات کوردستان ماو، هامساز بوون.

بنەمال هامساز بین:

  I.            ڤەسەر بنەمای زەمانەت یەکسانی سەروەریێ سیاسی نەتەوەیی ئەڕان ڕوژهەڵات کوردستان.

 II.            ڤە بنەما ڤەرگرتن پرنسیپ حەق سەروەری سیاسی ئەڕان گشت نەتەوەل جوغرافیای ئێران ڤە بوونە هام ئاهەنگی و هام پشتی و سازکردن بەرەیک ئەڕان هام کاری کردن ڤەگەردێیان.

 III.            ڤە بنەماڤەرگرتن یەکسانی ڕەگەزی و قەبوول کردن یەکسانی، ڕێبەرایەتی و کارگەری ژەن ڤە جمشت ڕزگاری وازی کوردستانا.

 IV.            ڤە بنەماڤەرگرتن پرنسیپەل دێمۆکراتیک و دامازریا کردن یەکگرتنێ جمشت نەتەوەیی، پێشگیری کردن ڤە درسکردن ناوچەل ژێر دەسەڵات حزبی.

 V.            ڤە بنەماڤەرگرتن و زەمانەت کردن حەق یەکسانی جیاوازییەل(دینی، شێڤەزاری و ڕەگەزی)ئێ کوومەڵگای کوردستان.

VI.            ڤە بنەماڤەرگرتن سەروەری قانوون و پەیڕەو کردن  شەفافییەت ئداری ڤە گشت دامازراوەل.

ڤە بنەماڤەرگرتن ئی پرنسیپەلە،رەوشتێ گشت حزبەل و ڕێکخراوەل سیاسی ڕۆژهەڵات مەزانیمن ک ڤە بوونە ئیجاد یەکگرتن سەقامدار نەتەویی، ڤە کردار وژیان ئی گامەلە هێز بەن:

1.     دامازرانن شورای باڵای ڕێبەرایەتی و بڕیار، پیەکهاتێ ڤە حزب و ڕێکخراوەل سیاسی ڕۆژهەڵات.

2.     یەکاهایشتن هێز پێشمەرگە و گەریلا و درسکردن ستاد مەرکەزی فەرماندەیی سپای نیشتمانی ڕوژهەڵات، ک گرێواردێیەسە فەرمانەل شورای باڵای ڕێبەرایەتی و بڕیار.

3.     درسکردن کۆمیسیون پەیوەندییەیل شورای باڵای ڕێبەرایەتی و بڕیار ئەڕا چالاکی دیپلۆماتیک و نۊنەرایەتی سیاسەتی یەکگرتوویی کورد ڤە ڕۆژهەڵات.

4.     ڕێهایشتن دامازراوەی دادەوەری.

5.     ڕێهایشتن میدیای نەتەویی ک زوانێ حاڵ شورای باڵای ڕێبەرایەتی بوو.

6.     ڕێهایشتن دامازراوەی پاراستن ئاسایش کوومەڵایەتی کوردستان

7.     ڕێهایشتن کۆمیسیون بەڕێبەرایەتی دەمودەزگایل کوردستان ڤە هەماهەنگی و بەشداری کۆمەڵگای مەدەنی

8.     ناقانوونی شناسین هەر جوور هئووڵ داین تاکەکەسی یا حزبی ئەڕا حەق سەنن یا سزادان شاروەندەل، ڤە شوونێ نەمەنن دەمودەزگایل داگیر کەر ئسلامی ڤە کوردستان

ڤە دوماوە، گشت حزبەگان بایە ئاگادار ئی ڕاستیە بوون گ خەڵک ڕۆژهەڵات نمەتۊەنێ ئەڕا ماوە نادیارێک چەمەڕێ یەکڕێزی حزبەگان بوود و نە قەبووڵیشە مەکێد ک ئێ ئەگەر هالی بۊن، ئە حزبەلە ڤە ڕێهایشتن ڤە هاز چەک گشت جومگەل دەسەڵات قورخ بکەن و ئازمون باشوور دووجارە بکەنا.، ڤە شوونێ نەمەنن دەمودەزگایل داگیر کەر ئسلامی ڤە کوردستان.

ژ.ت