بنەماڵەی زیندانیانی زیندانی ڕاگیراو لە ئیمرالی کە زیاتر لە ٣٧ مانگە گۆشەگیرکراون، وەک هەموو هەفتەیەک، ئەم هەفتەیەش داوای دیداریان تۆمار کرد.

محەمەد ئۆجالان، برای عەبدوڵا ئۆجالان و پارێزەر مەزڵوم دینچ، داوای دیداریان پێشکەش بە داواکاری گشتیی بورسا و بەڕێوبەرایەتی زیندانی ئیمرالی کرد.

عەلی کۆنار برای عومەر خەیری کۆنار و پۆلات یڵدرم برای حامیلی یڵدرم و مەلیحە چەتین خوشکی وەیسی ئاکتاش کە لە زیندانی ئیمرالی گۆشەگیر کراون، بە هەمان مەبەست داوای دیداریان کرد.

پەیوەندییەکانی ڕێبەری گەلی کورد عەبدوڵا ئۆجالان لەگەڵ جیهانی دەرەوە بە تەواوی پچڕاوە. داوای دیدارەکان وەڵام نادرێتەوە، هەندێک جار دوای چەند مانگێک پارێزەران ئاگادار دەکرێنەوە کە سزای دیسپلینی بەسەریاندا سەپێنراوە.