ناوەندی ڕاگەیاندنی هەسەدە، سەبارەت بە جووڵە سەربازییەکان لە دەیرەزۆر ڕوونکردنەوەیەکی بڵاوکردەوە. دووپاتی دەکاتەوە ئەو زانیارییانەی دەزگاکانی ڕاگەیاندن لە چەند ڕۆژی ڕابردوودا سەبارەت بە جووڵەی هێزەکانیان لە دەیرەزۆر بڵاویانکردۆتەوە، هەموویان ناڕاست و بێ بنەمان.

لە ڕاگەیاندراوەکەدا هاتووە:

"هەندێک دەزگای ڕاگەیاندن لە چەند ڕۆژی ڕابردوو هەواڵی ناڕاستیان بڵاوکردەوە سەبارەت بە جووڵەی هێزەکانمان لە هەرێمی دەیرەزۆر، هەندێکی تریان مەزەندەی جیاوازیان هەبووە دەربارەی ئامانجی هێزەکانمان، دووپاتی دەکەینەوە هەموو پێشبینییەکان ناڕاست و بێ بنەمان.

هێزەکانمان لە ڕۆژانی ڕابردوو ئۆپەراسیۆنی ئاسایی و ڕۆتینی خۆیان ئەنجامداوە بۆ پاراستنی ئاستی پێشکەوتن لە بەرەنگاربوونەوەی تیرۆریستانی داعش و بەدەستهێنانی ئارامی و ئاسایشی زیاتر بۆ هەرێمەکە، بە هەماهەنگی لەگەڵ هێزەکانی ئاسایشی ناوخۆی باکور و ڕۆژهەڵاتی سوریا، بە هاوسەنگی لەگەڵ قەبارەی هەڕەشەی شانە تیرۆریستییەکان.

هێزەکانمان، هەروەها هێزەکانی ئاسایشی ناوخۆ لەماوەی داهاتوودا چالاکتر دەبن لەپێناو لەناوبردنی تەواوەتی داعش و پاراستنی دانیشتووان".