یۊ جە فەرمانڎە سەرمەشقەکا پەژاکی و ئەندڎامو دەسەی ڕاوەبەری کۆداری، ڕێزان جاوید (یوسف ڕەبانی)، ڕۊو ٦و ئابو ٢٠٢٢ جە هجومېوە دەوڵەتو تورکی ئەرەگیرینە جە قامیشلۆ گەشمەرڎە بی، جە یۋەمین ساڵوەگېڵ و گەشمەرڎەبیەیشەنە بە سازکەرڎەی مەراسیمێوە جە شارو لیژی بەلجیکای یاڎش بەرزڕاگیریا.

مەراسیمەکە جە جەمەو کلتووری و هونەری، بە دەیەقېوە ڕێزگرتەی دەسشپنەکەرڎ. دماو قسۍ نوێنەرو ڕێکوزیاو خانەواڎەو گەشمەرڎا، سیامەند موعینی، هامسەرۆکو پەژاکی قسېش کەرڎۍ و ۋاتش: "هەڤاڵ ڕیزان کەسایەتیېۋە گۊرە و ڕابەرو ئێمە بۍ، جە ژیۋایشەنە ڕای ڕاسیس گرتەنەۋەر، بە گرڎو هێز و توانایشۊ جە گرڎ یاگېنە سەرمەشقیش کەرڎ و خزمەتش بە گەلەکەیش کەرڎ. پېسە ۋېش واچۍ: "یاۋای بە ئازاڎیی قوربانیدایش گەرەکا".

موعینی جە درێژەو قسەکاشەنە ۋاتش: پۍ بەدیئامای ئامانج و ویستو گرڎو گەشمەرڎا، درێژە بە ڕاکېشا مڎەیمۍ، دوژمنۍ و ئەرەگیرۍ کورڎسانی بە حیچ جۊرۍ جە گفتوگۆکەرڎەی  نزیکۍ مەباوە و ئاسایتەرین مافەکا گەلوو کورڎی پاشێل کەرا. جە دەسدای هەڤاڵ ڕیزانی چی وەختەنە پۍ ئێمە خەسارێوە گۊرە بۍ، بەڵام ئارۊ هەزاران ڕیزانۍ ڕێۋگارۍ ئی ڕېنۍ و درێژە بە ڕاکۍ مڎا.

جە ۋەردەوامی مەراسیمەکەینە ڕەمزی کارتاڵ، هامسەرۆکو کۆنگرەو گەلی، قسېش کەرڎۍ  و ۋاتش: "گەشمەرڎەبیەو هەڤاڵ ڕیزان جاویدی بەدڵنیاییوە خەسارێوە گۊرە بۍ، بەڵام مشۊم ڕاسی ماناو گەشمەرڎا بزانمۍ، پۍ ئانەی بتاۋمۍ ئامانجو گەشمەرڎا بەدی بارمۍ. جە گرڎو سەرهۊرداکا جە حەر چوار پارچەنە، دوژمنۍ وەختۍ سەرگنا، کە خەتەو خیانەتی بەکارمارا، تەنیا جمیەرېوە کە ۋەران ۋەرشەنە سەرکۊتەیشا بەدەس نارڎەن، ئا جمیەرەنە کە قەناعەتش بە ۋېش و گەلەکەیش هەن، جمیەرېوە کە سەرکۊتەیش پۍ ۋېش بە بنەما گرتەن و ئاڎیچ جمیەری ئاپۆییا. حەر پۊکەی گەشمەرڎۍ ئی جمیەرەیە جیاوازېنۍ جە گەشمەرڎا گرڎو جمیەرەکا تەری. چونکی پەرسو کورڎی، پەرسێوە فرە گرنگ و قورسا. راسا بە گەشمەرڎەبیەو هەڤاڵاما، هێز جەستەییما کەم بۊوە، بەڵام جە ڕوو ڕۆحییوە گۊرەتەرۍ بیمۍ و گەشە کەرمۍ. ئانە ورە و لایەنی ڕۊحین کە جمیەرما و هیواما گەشتەر کەرۊ".

ڕەمزی کارتال ئاماژەش پانەیچ کەرڎ، "گەشمەرڎۍ، بە ۋېڕاگری و ژیۋایشا، نموونۍ ۋیری و باوەڕینۍ و میاۋناش بە بەرزتەرین ئاست. ھیواتا بە مدرامانی بۊ، چونکی وەخت وەختو ئازاڎیا. وەخت وەختو ئازاڎیی ڕابەر ئاپۆیا. مەبۊ حیچ کەسێوە ئانەی پېسە ۋەرمی بنیۊرە، چونکی دەوڵەتە ئەرەگیرەکۍ زیاڎ جە گرڎ وەختۍ تەنگەتاوۍ بیېنۍ و فشارشا سەرا. ئەگەر خەتەو مدرامانی ۋەڵۍ وزمۍ، وڕنایسا مسۆگەر کەرمۍ و متاۋمۍ دەوڵەتەکا ناچار کەرمۍ ڕا پۍ ئازاڎیی ڕابەر ئاپۆی ۋەش کەرا. مشۊم بە گرڎ جۆرێوە بازنېوە دەورو ڕابەر ئاپۆیرە ۋەش کەرمۍ. ئەگەر کەسێوە جە ۋەرکەوت یا جە بەشێوە تەرو کورڎسانینە گیانش بەخشۊ، کەسێوە تەر جە یاگۍ تەر درێژە بە کۊشیای مڎۊ. ئینەیچ بە ماناو دلېنەشیەی سنوورەکان و ئانەی سەلەمنۊ چارەنۋیسو گەلەکەیما جە حەر چوار پارچەو کوردسانی پېۋەرە  بەسیانۊ".

جە درێژەو مەراسیمەکەینە بەڵگەفیلمێوە جەبارەو ژیۋای و کۊشیای گەشمەرڎە ڕیزان جاویدیۊ نمایشکریا و مەراسیمەکە بە دروشمەکا "گەشمەرڎۍ مەمرا"، "بۍ سەرۆکی ژیۋای مەبۊ" و "ژەنی، ژیای، ئازاڎیی" دمایش ئاما.

هـ . ش