دەستەی بەڕێوەبەریی ئەنجوومەنی گەنجانی دەم پارتی، لە کۆبوونەوەکەیدا دەربارەی بانگەوازەکەی ڕێبەر ئاپۆ داوای لە گەنجان کرد بەرپرسیارێتی هەڵبگرن و ڕۆڵی پێشەنگایەتی بگێڕن و گوتی، بۆ پێشکەوتنی پرۆسەکە دەبێت ڕێبەر ئاپۆ ئازاد ببێت.
دەستەی بەڕێوەبەریی ئەنجوومەنی گەنجانی دەم پارتی، ئەنجامنامەی کۆبوونەوەکەی ئاشکرا کرد کە پاش بانگەوازەکەی ڕێبەر ئاپۆ ئەنجامیدا. ئاماژە بەوە کراوە پێش کۆبوونەوەکە، لەگەڵ هاوسەرۆکانی گشتی دەم پارتی و ئەندامانی شاندی ئیمراڵی، تولای حاتەم ئۆغۆللاری و تونجەر باقرخان کۆبوونەتەوە و گفتوگۆیان کردووە.
دەستەی بەڕێوەبەریی ئەنجوومەنی گەنجانی دەم پارتی تیشکی خستەسەر بانگەوازەکەی ڕێبەر ئاپۆ، جەخت دەکاتەوە لەم قۆناغەدا بانگەوازەکەی ڕێبەر ئاپۆ گرنگییەکی ژیانیی هەیە.
هەروەها ئاماژە بەوە کراوە، پارادایمی دەوڵەت_نەتەوە پاش کاریگەرییە نەرێنییەکانی (کۆمەڵکوژی و نکۆڵی کەلتووری و هەڵوەشانەوەی کۆمەڵایەتی) لە ڕۆژهەڵاتی ناوەڕاست و تورکیا، لە سەدەی ٢١ شکستی هێناوە و چیتر لەکارکەوتووە.
هەروەها جەخت دەکاتەوە، هەوڵەکانی ڕێبەر ئاپۆ بۆ ئاشتی، لەلایەن دەسەڵاتەوە بەخراپی قۆستراوەتەوە و بە پیلانگێڕی وەڵام دراوەتەوە.
هەروەها دووپاتکراوەتەوە، ئەگەر ناوەڕۆکی بانگەوازەکە جێبەجێ نەکرێت و هاوپەیمانی کورد_تورک و ژیانی هاوبەش پێک نەیەت، هێزەکانی سەرمایە بە خواستی خۆیان هەرێمەکە دادەڕێژنەوە، گوتی: "ئێمەی گەنجان وەک هێزی پێشەنگی کۆمەڵگەی دیموکراتیک، دەبێت پێشەنگایەتی ئەم پرۆسە نوێیەی گۆڕانی کۆمەڵایەتی بکەین و ڕۆڵی کاریگەر بگێڕین و گەل بەشداری پرۆسەی دیموکراتیک بکەین. دەبێت بەرپرسیارێتی خۆمان لە بوارەکانی پەروەردە و ڕێکخستن و کەلتوور و هونەر و وەرزش و کۆمۆن و ئەنجوومەنەکان بەجێ بگەیەنین. بۆ ئەوەی پرۆسەکە سەرکەوتوو بێت، دەبێت هەلومەرجی بەڕێز ئۆجالان باشتر بکرێت کە ملیۆنان مرۆڤ بە ڕێبەری خۆیانی دەزانن. تا ئەمە نەکرێت، پرۆسەکە لەڕووی متمانە و پراکتیکەوە لاواز دەمێنێتەوە".
