ئێوارەی ئەمڕۆ، لە هۆڵی کتێبخانەی گشتی کەلار لە شارۆچکەی کەلاری ناوەندی ئیدارەی گەرمیان، مەراسیمی ناساندن بۆ کتێبی "پەروەردەی زهنی" ئەنجامدرا و لەلایەن محەمەد بەکر، نوسەری کتێبەکەوە ناساندن بۆ کتێبەکە کرا، کتێبەکەش باس لە کێشە زهنییەکان دەکات نوسەر لە کتێبەکەدا کێشەکان و چارەسەری دەخاتە ڕوو. سەبارەت بە کتێبەکە محەمەد بەکر بۆ ئاژانسی هەواڵی فورات (ANF) قسەی کرد.

لە سەرەتایی قسەکانییدا نوسەر محەمەد بەکر باسی لەوەکرد کتێبەکەی لە ١٧ پێڕست پێکدێت و گوتی: "لە کتێبەکەدا هەوڵمداوە پێناسەیەکی گشتگیر بۆ پەیڤی زیهنیەت بکەم بۆ ئەوەی بۆ خوێنەرانی کتێبەکە ڕوونبێت چونکە تاوەکو ئێستا تێگەشتن و ئاشنا بوونێکی ئەتۆ لەسەر زهن نییە.

هاوکات ویستوومە لە ڕێگەی ئەم کتێبەوە قەیران و گێژاوەکانی مرۆڤایەتی، کێشە نەتەوەی و سیاسیی و ژینگەی و خێزانییەکان هتد..... گرێبدەم بە کێشە زهنییەکانەوە. لە خاڵێکدا ئاماژەم بەوەکرد کێشەی زهنی چەقی هەموو کێشەکانی کۆمەڵگەی مرۆڤایەتین."

'باسم لە پەروەردەی زهنی و شۆرشگێڕبوون کردووە'

وتیشی: "لە تەوەرەکانی تردا هەوڵمدا رێگەی چارەسەری دابنێم کە ئیمە چۆن بتوانین خۆمان پەروەردە بکەین لە ڕووی زهنییەوە. باسم لە پەروەردەی زهنی و شۆرشگێڕبوون کردووە، چۆن شۆڕش مەرجی سەرەکی زهنە؟ چونکە هەموو شۆڕشێک بۆ ئەوەی بە گەردوونی ببێت و بە ئازادی و دادپەروەری و سۆسیالیستی بگات دەبێت پەروردەی زهنی بەبنەما بگرێت."

'مرۆڤەکان پێویستیان بە یەکێتی زهنی هەیە'

لە کۆتایی قسەکانییدا نوسەر محەمەد بەکر ئاماژەی بەوەکرد مرۆڤ چەند هەڵگری هۆشیاری و ئایدۆلۆژیا بێت ئەگەر نەتوانێت ڕێ و ڕێبازەکەی پەروردە بکات ناتوانێت بگات بە پێشکەوتن و گوتی: "لە کۆتایی کتێبەکەدا ئاماژە بەهەندێک هەڵەی چەمکەکان دەکەم لە پەروەردەدا، بە دەیان خولی پەروەردەیی دەبین و بەرنامەی پەروەردەیی دەبینن، بەڵام لەبەر ئەوەی ئەو پەروەردانە بە چەمکێکی هەڵە دەگیرێنەبەر بابەتە زهنییەکان بە ئامانج ناگرن، ئەو جۆرە پەروەردانە مرۆڤی چەقبەستوو و خوبەزلزان و خۆپەرەست دروست دەکات. مرۆڤێک دروست ناکات بە دەم ئازادی و یەکسانییەوە بێت.

کۆی کتێبەکە پێمان دەڵێت مرۆڤەکان پێویستیان یەکێتی زهنی هەیە ئەو یەکێتییە زهنیەش لە میانی هاوڕێتی و هەڤاڵێتیەوە ئەنجام گیردەبێت."

مەراسیمەکە بە پرسیار و وەڵام و دابەشکردنی کتێبەکە بە واژۆی نوسەرەوە بە کۆتایی هات.