ژینا مودەریس گورجیە پەی تەمامکەردەی ماوەو سزاکێش رەوانەو زینانی کریا
ژینا مودەریس گورجیە كە یووەنە جە دەسبەسەرکریایا ۋێنیشانداکا شۆڕشو”ژەنۍ ژیۋای ئازادیی” بە مەبەسو ۋییەرنای ماوەو سزاکێش ڕەوانەو زینانو ژەنا سنەی کریا.
ژینا مودەریس گورجیە ڕۆنامەوانە و چالاکەو بوارو ژەنا جە پەلیانەو ئینستاگرامو ۋێشەنە سەبارەت بە زینانیی کەردەکەیش پەیامێوەش وەڵا کەردۆ.
ژینا مودەریس گورجیە ئەرەیاۋنانش، ئارۆ ملو پەی زینانو ژەنا سنەی کە پەراوێز وستەی و جیاکەردەیۆ ڕەگەزی و چینایەتی و نەتەوایەتی چا یەرۍ ئانەن.
ئەرەیاۋنانیچش، "کاتێ کەلوپەلەکام پەی زینانی ئاماڎە کەرێنا وەڵۍ گرڎ چێوێنە هیوام وست دلۍ هەگبەکەیمۆ و من بە هیواوە ملو پەی وای."
جە چن ڕۆی ۋییەردەنە ژینا مودەریس گورجیە وەڵاش کەردەبێوە، جە لایەنو لقو ٤ و بەشو جابەجێکەردەی سزاکاو دادگاو سنەیۆ نامێوەش بە دەس یاوان، کە مشۆم ۋێش بە زینانو ژەنا سنەی بشناسۆ بە مەبەسو جابەجێکەردەی سزاکێش.
ئانەیچ جە كاتێنە، جە مانگەو حوزەیرانو ئێساڵینە، ژینا مودەریس گورجیە جە لایەنو لقو یوەمو دادگاو شۆڕشو سنەیۆ ٢١ ساڵۍ زینانیش سەرەرە سەپیا و دماتەر سزاکێش جە لایەنو لقو ٤و دادگاو سنەیۆ پەی ٢٦ مانگا زینانی کەمکریاوە، دماتەر بەپاو ماددەو ١٣٤، سزاکێش پەی ١٦ مانگا زینانی کەمتەر کریاوە.
یاگۍ ئاماژەینە ئا چالاکۍ وەڵتەریچ جە كاتو ۋێنیشانداکا شۆڕشو “ژەنۍ ژیۋای ئازادیینە” باڵبەسە کریێنە و تا ئیساتۍ چڼین ئەرەنیشتۍ دادگای کەردەیش لوێنۍ ڕاوە و سزاکێش پەی تازە کریێنۍ.
