لە گۆڕەپانی هیلڤیتیاپلاتز لە شاری زوریخی سویسرا بۆ زارا محەمەدی چالاکییەک ئەنجامدرا، کە لەسەر فێرکردنی زمانی کوردی بە منداڵانی کورد لەلایەن رژێمی ئێرانەوە زیندانیکراوە و سزای ٥ ساڵ زیندانیکردنی بۆ دەرکراوە. ئەندامانی بنەماڵەی محەمەدی و نوێنەرانی ڕێکخراوەکانی کۆمەڵگەی مەدەنی لە چوار پارچەی کوردستانەوە بەشدارییان لە چالاکییەکەدا کرد.

کانی محەمەدی خوشکی زارا محەمەدی لە چالاکییەکەدا وتەیەکی پێشکەشکرد و داوای ئازادکردنی دەستبەجێی زارا محەمەدیی کرد. کانی محەمەدی وتی: خوشکەکەی تەواوی ژیانی بەخشیوە بە فێرکردنی زمانی کوردی و وتیشی: "ماوەی ١٢ ساڵە بەبێ راوەستان و بە پێداگرییەوە کۆرس و خولی فێرکردنی زمانی کوردیی دەکردەوە و منداڵانی پەروەردە دەکرد. ئێمە شانازی بە کارەکانی زاراوە دەکەین. زارا دەبێت دەستبەجێ ئازاد بکرێت".

عەلی شیمشەک بە ناوی ئەنیستیتۆی زمانی کوردی مافی قسەکردنی وەرگرت و وتەیەکی پێشکەشکرد و رایگەیاند، "لە هەر چوار پارچەی کوردستان هێرش دەکرێتە سەر زمان، کولتور و ناسنامەی کورد. پێویستە هەموو کورد لە دژی هێرشەکان خاوەنداری لە زمان، کولتور و ناسنامەی خۆیان بکەن".

دوای وتەکان، چالاکییەکە بە وتنی گۆرانی و هۆنراوە کۆتایی پێهات.

ژ.ت