هاوسەرۆکی گشتی ئیهەدە ئەرەن کەسکین و چەندین پارێزەر بەشداری چالاکییەکە بوون. لە چالاکییەکەدا پانکارت بە نوسینی "نا بۆ قەیوم! ڕێز لە ئیرادەی گەل بگرن" دانرا و دروشمی "قەیوم دەڕوات، ئێمە دەمێنینەوە" بەرزکرایەوە.

لە ڕاگەیاندراوەکەدا ئەرەن کەسکین ئاماژەی بەوەدا دەستبەسەرداگرتنی شارەوانییەکان لە دژی یاسایە و جەختی کردەوە لەوەی دەستبەسەرداگرتنی شارەوانی شیشلی دەستوەردانە لە بەرانبەر ئیرادەی هەڵبژاردنی کورد و گوتی: "ئەمە دووژمنایەتییە لە بەرانبەر گەلی کورد. لە لایەک باسی پڕۆسەی نوێ دەکرێت و لە لایەکی دیکەوە لە بەرانبەر گەلی کورد دووژمنایەتی ئەنجام دەدریت."

سەرۆکی لقی ئەستەنبوڵی ئیهەدە گوڵسەران یۆلەری ئەوەی بیرهێنایەوە تاوەکو ئێستا ١٢ شارەوانی دەستی بەسەردا گیراوە و ئاماژەی بەوەدا دەستبەسەرداگرتنی شارەوانییەکان لە دژی ڕێبازەکانی دەوڵەتی یاسایی دیموکراتیکییە.

ئیهەدە سەبارەت بە دەستبەسەرداگرتنی شارەوانییەکان نامەیەکی بۆ وەزارەتی ناوخۆ نارد و لە نامەکەدا داوای کردوە ئەو بڕیارانەی دراوە دیسان هەڵسەنگێنرێتەوە و هەڵوەشێتەوە.