ئیشکگریی دادپەروەری بە پێشەنگایەتی کۆمەڵەی پشتیوانی لە بنەماڵەی زیندانیان (توای دەر) لە بارەگای پارتی هەرێمە دیموکراتیکەکان (دەبەپە) کە لە ئێلح دەستیپێکردووە، لە ٧١هەمین ڕۆژیدا بەردەوامە.

لە چالاکییەکەدا پانکارتی " لە دایکانی قارەمانەوە، هەزار سڵاو بۆ زیندانەکان". ئێمە بە هێزی خۆمان گۆشەگیری دەشکێنین و ژیانێکی ئازاد بنیات دەنێین" هەڵواسرابوو. دایکان لە چالاکییەکەدا پێشبەندێکیان لەبەردایە کە لەسەری نووسراوە "گۆشەگیری تاوانێکە دژی مرۆڤایەتی".

چالاکوانانی بزووتنەوەی ژنانی ئازاد (تەژەئا) و پێشەنگەکانی پارتی یەکسانی و دیموکراسی گەلان، دەم پارتی و دەبەپەی شارەکە سەردانی چالاکییەیان کرد.

دایکان دووپاتیان کردەوە، تا گۆشەگیری لەسەر عەبدوڵا ئۆجالان هەڵنەگیرێت، ڕۆڵەکانمانیش لە ژێر گۆشەگیریدا ڕزگاریان نەبێت بەردەوام دەبن لە چالاکییەکانیان.بەوبۆنەوە داوا لە هەمووان دەکەین دەستی یەکبگرن و هەستن. سێ ساڵە هیچ زانیارییەک لە بەڕێز ئۆجالانەوە نەدراوە. ڕۆڵەکانمان تا گۆشەگیری کۆتایی پێدێت و پەیامێک لە بەرێز ئۆجالانەوە دەگات درێژە بە چالاکییەکەیان دەدەن."

هەروەها سەعدیە یاردم دایکی ئەحمەد یاردم کە لە زیندانی ئافیۆنکاراهیسارە، بەرخۆدانی دایکانی پیرۆز کرد. یاردم لە درێژەی قسەکانیدا وتی: کوڕەکەم گۆاسترایەوە بۆ ئافیۆن. خێزانێک کە منداڵێکیان لە هەمان زیندان بوو زانیارییان پێداین. لە دوایین دیدارم، پێش جەژن کە  چوومە سەردانی کوڕەکەم، من و بنەماڵەیەکی تر تا سەعات چوار لە دەرەوە ڕایانگرتین. کاتێک چووینە ژوورەوە زۆر پێماندا گەڕان."

دوواتر یاردم وتی: "کوڕەکەم پێی ڕاگەیاندم، ئیتر ناچینە چاوپێکەوتنەکان، ئێوەش لە دەرەوە بەرخۆدانتان درێژە پێبدەن، بەرخۆدانەکەتان هیوامان پێدەبەخشێت. سڵاوم ئاراستەی دایکانی بەرخۆدێر دەنێرم و دەستیان ماچ دەکەم.

ئیشکگریی دادپەروەری بە دروشمی "ژن، ژیان، ئازادی"، "بژی بەرخۆدانی زیندان" و "بەبێ سەرۆک ژیان نابێ" کۆتایی هات.