له‌ پاریسی پایته‌ختی فه‌ڕه‌نسا به‌ به‌شداریی ئه‌ندامانی یه‌كێتیی ژنانی سۆسیالیستی ئه‌ورووپا (SKB) له‌ ئه‌ڵمانیا، به‌لجیكا، هۆڵندا و به‌ریتانیا ڕۆژانی ٢٩-٣٠ی ئه‌یلوول\٧-٨ی ڕه‌زبه‌ر كۆنگره‌ی یه‌كێتییه‌كه‌ به‌ڕێوه‌چوو. له‌ كۆنگره‌كه‌دا له‌ كه‌سایه‌تی شه‌ڤین سۆگوت گه‌ریلای پارتی ماركسیست لینینیستی توركیا (MLKP/FESK)دا یادی هه‌موو ئه‌و ژنانه‌ كرایه‌وه‌ كه‌ له‌ تێكۆشانی ئازادیدا ژیانیان له‌ده‌ستداوه‌.

یه‌كێتیی ژنانی سۆسیالیستی ئه‌ورووپا ئه‌نجامنامه‌ی پێنجه‌مین كۆنگره‌ی خۆی بڵاوكرده‌وه‌ كه‌ ئه‌مانه‌ چه‌ند بڕیارێكی كۆنگره‌كه‌ن:

 - ئێمه‌ ده‌نگی خۆمان ده‌خه‌ینه‌ پاڵ ده‌نگی دایكانی ئاشتی كه‌ ماوه‌ی ٢٣ ساڵه‌ به‌بێ وه‌ستان به‌دوای بێسه‌روشوێنه‌كانیاندا ده‌گه‌ڕێن و له‌ به‌رانبه‌ر هه‌موو جۆرێكی‌ هێرشه‌ فاشیست و دیكتاتۆرییه‌كان به‌رخۆدان ده‌كه‌ن.

- به‌ گوێره‌ی هه‌لومه‌رجی سه‌ربه‌خۆیی ژن، له‌ به‌ره‌ی ژناندا له‌ هه‌موو وه‌ڵاتان خاوه‌نداره‌تی له‌ كه‌مپینی كۆنفیدراسیۆنی كۆچبه‌رانی بنده‌ست له‌ ئه‌ورووپا ده‌كه‌ین كه‌ دژ به‌ هه‌موو جۆره‌كانی نه‌ژادپه‌رستی ڕاگه‌یه‌نراوه‌.

- پشتگیری له‌ ڕێكخستنی شۆڕشی ژنانی ڕۆژاڤا له‌ ئه‌ورووپا ده‌كه‌ین كه‌ وه‌ك شۆڕشی خۆمان ده‌یبینین.

- چاودێری پڕۆسه‌ی ڕێكخستنی كۆنفیدراسیۆنی ژنانی ئه‌ورووپا ده‌كه‌ین و به‌شدار ده‌بین له‌ هه‌نگاوه‌كانی.

- به‌شداری ده‌كه‌ین له‌ كۆبوونه‌وه‌ی هیندستان كه‌ تیایدا له‌ ڕه‌هه‌ندی ئایدیۆلۆژییه‌وه‌ گفتوگۆ ده‌رباره‌ی تێكۆشانی ئازادی ژن ده‌كرێت.

- گرووپه‌كانی خۆپاراستنی ژنان داده‌مه‌زرێنین و وه‌رزشی خۆپاراستن له‌ هه‌موو شوێنێك بڵاوده‌كه‌ینه‌وه‌.

s.m