ژنانى کوردستانی و فەرەنسى بەشدارى فێستیڤاڵەکە بوون و جارێکیتر داواى "دادپەروەری و روونبوونەوە"ی کوشتارەکەى پاریسیان کرد، کە ساکینە جانسز (سارا)، فیدان دۆغان (رۆژبین) و لەیلا شایلەمەز (رۆناهی) تیادا شەهیدبوون.

فێستیڤاڵەکە لەلایەن بزووتنەوەى ژنانى کورد لە فەرەنسا (TJK-F) رێکخرا و چەندین پۆستەر و وێنە و لافیتەیان لە گۆڕەپانى فێستیڤاڵەکەدا بەزرکردبووە. هاوکات پۆستەر و لافیتە و وێنەى حیزبى کۆمۆنیستى فەرەنسا، رێکخراوى جیهانیى ژنان و رێکخراوەکانیSKB   و  FEDAلەگەڵ وێنەکانى ساکینە جانسز، فیدان دۆغان، لەیلا شایلەمەز و ئەو ژنە سیاسییانەى کە لەم ساڵانەى دوایدا لە سەرتاسەرى جیهان کوژرابوون، هەڵواسرابوون.

هاوکات چەندین پەرلەمانتاری فەرەنسى و بەڕێوەبەرى شارەوانى لە ناوچە جیاجیاکانى فەرەنساوە بەشداریى فێستیڤاڵەکەیان کرد.

فێستیڤاڵەکى بە خولەکێک رێزگرتن دەستى پێکرد. دواى ئەوە شەنگول کاراجا بە ناوى بزووتنەوەى ژنانى کورد لە فەرەنسا وتەیەکى پێشکەش کرد و رایگەیاند، سەربەرزن بە ناوی رۆژبین (فیدان دۆغان)ەوە فێستیڤاڵێکى بەمجۆرە بەڕێوەدەبەن. کاراجا راشیگەیاند، دەبنە درێژە پێدەری رێگاى تێکۆشانەکەى رۆژبین (فیدان دۆغان)، ساکینە جانسز و لەیلا شایلەمەز و تاوەکو ئەو کاتەى کۆمەڵکوژکردنی ئەو ژنە تێکۆشەرانە روون دەبێتەوە، دواى دۆسییەکەیان دەکەون و دەستبەرداری دۆسیەکەیان نابن.

لاورێنس کۆهێن سیناتۆری ناوچەی ناوچەى ڤاڵ دو مارن، سیلڤییە ژان سەرۆکى کۆمەڵەى فەرەنسا – کوردستان وتەیان پێشکەش کرد و رایانگەیاند، دادگایى نەکردنى ئەو هێز و کەسانەى لە پشت کۆمەڵکوژییەکى پاریسەوەن، بۆ فەرەنسا مایەى شەرمە، لەبەر ئەوەش بەشدار دەبن لە تێکۆشانى ژنانى کورد دا بۆ روونکردنەوەى ئەو کۆمەڵکوژییە و دادگایکردنى تاوانباران.

دۆستانى کورد باسى گرنگیى هەڵبژاردنیان کرد بۆ تێکۆشان لە دژى رژێمى ملهوڕ و دەسپۆتی ئەردۆغان و رایانگەیاند، لە ٢٤ى حوزەیراندا گەلی کورد و هێزە دیموکراسییەکانى تورکیا بەشێک دەبن لەو پرۆسەیە بۆ گۆڕانکاری.

هاوکات دەستەى بەڕێوەبەرى کۆما ژنانى کوردستان (کەژەکە) پەیامێکى بۆ فێستیڤاڵەکە ناردبوو و تیایدا سڵاو لە ئامادەبوان کرابوو و رایانگەیاندبوو "ئەو ژنانەى هێزى پێشەنگى شۆڕشن، گرنگە لە راستیى سیستمى ئەوروپا باش تێبگەن و پێویستە لەسەر بنەماى دڵسۆزى بۆ یادکردنەوەى شەهید سارا، رۆژبین و رۆناهی بە هێزەوە بە ئەرکی پێشەنگایەتیى خۆیان هەستن.

هەروەها نوێنەرانى SKB   و  FEDAو ڕێکخراوى جیهانیى ژنان لە فێستیڤاڵەکەدا وتەیان پیشکەشکرد و باسیان لە گرنگیى تێکۆشانى ژنان کرد. باسیشیان لە پێگەى ژنى کورد لەو تێکۆشانەدا کرد و راشیانگەیاند "پێویستە لە دژى نەژادپەرستى، فاشیزم، کوشتارى ژن و سیستمى باوکسالاری خەباتى هاوبەش بەڕێوە ببەن".

تیپى ژنانى تەڤ چاند (TEV-ÇAND')، کەوانى زێڕین، یەلدا عەباسی، ئۆزلەم باگلایان، نوارین، تیپى رۆژ ئاریا بۆ هەڵپەڕکێ و تیپی مۆسیقاى تیگەری ئوزای جەزایری لە فێستیڤاڵەکەدا چەندین گۆرانی و بەرهەمى هونەری و هەڵپەڕکێیان پێشکەش کرد و فێستیڤاڵەکە بە دروشمى "ژن، ژیان، ئازادی" کۆتایى پیهات.

ر.م