میدیا عبدوڵا، چالاکوانی بواری ژنان و مافی مرۆڤ، لەبارەی ژنان و گرنگیان لە ناو کۆمەڵگەدا وتی: "لەڕاستیدا ژنان نەک نیوەی کۆمەڵگەن، بەڵکو ئاڕاستەکاری سەرجەمی کۆمەڵگەن و پەروەردەکاری نەوەی داهاتوون."
میدیا عەبدوڵا، چالاکوانی بواری ژنان و مافی مرۆڤ، لەبارەی ئازادی ژنانەوە بۆ ئاژانسی هەواڵی فورات (ANF) قسەیکرد و وتی: "ئازادی ژنان ئازادی فکر و ویژدان و مامەڵەیە، نەک تەنها ئازادی جەستە و پۆشین، ژنان دەبێت گرنگی بە پەروەردەی هزری خۆیان و هۆشیارییان بدەن، چونکە ژنان تەنها نیوەی کۆمەڵگە نین، بەڵکو ئاڕاستەکاری سەرجەمی کۆمەڵگەن و ئەوانن پەروەردەکارانی نەوەی داهاتوو و پێکهێنەری کلتوور."
هەروەها لەبارەی گرنگی 8ی مارسەوە ئەو ڕای وابوو کە ئەم ڕۆژە یادکردنەوەی چالاکی و خەباتی ساڵێکی ژنان و پلان و پێشبینی ساڵی داهاتووە بۆ چالاکییەکان، باسی لەوەشکرد کە نەتەوە یەکگرتووەکان بۆ ئەمساڵ گرنگیان بەوە داوە کە ژنان وەبەرهێن و خاوەنی ئابوورییەکی سەربەخۆی خۆیان بن و لەم بارەیەوە رایگەیاند: "زۆر گرنگە ژنان خاوەنی ئابوورییەکی بەرهەمهێنەرانە و خۆبەڕێوەبەرانە بن و گرنگی بە خوێندن و خۆپێگەیاندن بدەن لە سەرجەم کایەکانی ژناندا، ئەوەی وادەکات ئێمە تا ئێستا ئازاد نەبین، ئەوەیە کە خاوەن سیستەمێکی خۆبەڕێوەبەر نەبووین و هەمیشە کولتووری دژە کورد زاڵبووە بەسەرماندا و ڕێگری لێکردووین، تەنها بەو پێشکەوتنە دەتوانین ڕووبەڕووی ئەو کولتورە دژە کوردانە ببینەوە."
ئەو چالاکوانەی بواری مافەکانی ژنان و مافی مرۆڤ باسی لەوەشکرد، کە هەندێ جار بەتەنیا کێشە لەوە نییە کە پیاوەکان پیاوسالارن، بەڵکو بەشێک لە ژنانیش بەهەمان شێوە بیردەکەنەوە و پەروەرە دەکەن و باسی لەوەشکرد کە لەم قۆناغەدا ژنان پێویستییان بە شۆڕشێکی فکری هەیە.
میدیا عەبدوڵا ئەوەشی خستەڕوو، کە شۆڕشی هزری کاریگەری لەبەشداری ژنان هەیە و وتیشی: "ژنان تا ئێستا لە زۆر دامەزراوە و شۆڕشەکاندا سێبەری پیاوان بوون، پێویستە ئەوان وەک مرۆڤ مامەڵە لەگەڵ خۆیان و دەوروبەریاندا بکەن، تاوەکو بتوانن ببنە پێشەنگ و سەرکردە لە هەر بوارێک کە بیانەوێت."
هـ . ب
