سەرۆکی یەنەکە بەبۆنەى ٤٩ـەمین ساڵیایدی دامەزراندنى یەنەکەوە ڕایگەیاند: دەمانەوێت جیاوازییەکان بخەینە خزمەت ئامانجەکانەوە، ناکۆکییە ناوخۆییەکان پێکەوە چارەسەر بکەین، یەکهەڵوێستیمان زامنی پاراستنی مافەکانمان دەکات".
بافڵ تاڵەبانی سەرۆکی یەنەکە بەبۆنەى ٤٩یەمین ساڵیادی دامەزراندنی یەنەکەوە کە لە ڕۆژێکی وەکو ئەمڕۆ لە ١ـی حوزەیرانى ساڵی ١٩٧٥ دامەزراوە، پەیامێکی بڵاوکردەوە. لە پەیامەکەدا تاڵەبانی ڕایگەیاند: ئەوەی لە ڕابردوودا لە پێناو چارەسەرکردنی کێشەکان و لێکنزیککردنەوەی لایەنەکان کردوومانە، بە هەمان ڕۆحییەتەوە بەردەوامیی پێدەدەین و دەمانەوێت ئاشتییەکی هەمیشەیی و دوور لە ململانێی نابەجێ ناوچەکە بگرێتەوە.
سەرۆکی یەنەکە دەشڵێت: جەخت لە قووڵکردنەوەی ئاشتی و پێکەوەژیان دەکەینەوە، دەرگای کاری پێکەوەییمان کراوە بووە و هەروا دەمێنینەوە، ڕێزی تەواو لەسەرجەم هێز و لایەنە سیاسییەکانی تری کوردستان دەگرین و دەمانەوێت جیاوازییەکان بخەینە خزمەت ئامانجەکانەوە، ناکۆکییە ناوخۆییەکان پێکەوە چارەسەر بکەین و بە ئیرادە و هێزێکی زیاترەوە لە دەرەوە دەربکەوین.
هەروەها بافڵ تاڵەبانی جەختیکردەوە، کوردستان پێویستی بەهەمووانە و دەنگمان پێکەوە زوڵاڵترە، یەکڕیزی و یەکهەڵوێستیمان زامنی پاراستنی مافەکانمان دەکات و ئەزموونەکانی رابردوو سەلماندوویەتی دووبەرەکی خزمەتی هیچ لایەک ناکات، پێویستە بە خەونێکی گەورەتر و نیشتمانیترەوە هەنگاوبنێین و چاومان لە خۆشگوزەرانیی خەڵک و داهاتووی گەشی کوردستان بێت.
هـ . ب
