بۆ پشتیوانی لە ئاسایشی ئێزدیخان، چالاکیی خەڵکی شەنگال بە دروشمی “ئێمە هەموو ئاسایشین” لە چوارەمین ڕۆژیدا بەردەوامە، هەر لە چوارچێوەی کاردانەوەکان دژی ڕێککەوتنی بەغدا و پەدەکە، سبەینێ خەڵکی شەنگال دێنە سەر شەقام.

خولی چالاکییەکە لەلایەن گروپێک لە چالاکوانانی خانەسۆرو سەردەشتەوە وەرگیرا و خەڵکی شەنگالیش گروپ گروپ بۆ دەربڕینی پشتیوانییان سەردانی چادرەکەیان کرد.

لەلایەکی دیکەشەوە، لە چوارچێوەی کاردانەوەکان دژی ڕێککەوتنەکەی بەغدا و پەدەکە لەدژی شەنگال، بڕیارە سبەینێ کاتژمێر ١٠:٠٠ی بەیانی، خەڵکی شەنگال بێنە سەر شەقامەکان و ڕێپێوان بکەن و داخوازییەکانیان دووبارە بکەنەوە.

پێشتر و لەم چوارچێوەیەدا، خەڵکی شەنگال ئەم داخوازییانەیان پێشکەشی حکومەتی عێراق کردبوو:

–لەکاتێکدا حکومەتی عیراق لێرە نەبوو، خوبەڕێوبەریی دیموکراتی شەنگال خاوەنداریی لە شەنگال کردووە، بۆیە پێویستە ئەم خۆبەڕێوەبەرییە لەگەڵ هەموو ڕێکخراوە گرێدراوەکانییەوە پەسەند بکرێن.

– ئاسایشی ئێزدیخان، کاتێک بۆشایی ئەمنی لێرە بوو، خەڵکی ناوچەکەی لە بەرامبەر هەموو هێرش و توندوتیژییەک پاراستووە، بۆیە پێویستە ئاسایشی ئێزدیخان لە چوارچێوەی یاسادا بناسرێتەوە.

– ئەگەر حکومەت ئەم داخوازیانەی ئێمە قبوڵ نەکات و جێبەجێیان نەکات، ئێمەش وەک خەڵکی شەنگال تا کۆتایی مافەکانمان دەپارێزین و خۆپیشاندانەکانمان بەرفراوان دەکەین، هیچ کەسێکیش ناناسین.

ف.ق