جەژنی چوارشەممەی سوور لە دۆڵی کەرسی شەنگال بە ئاهەنگێک پیرۆزکرا. ئاهەنگەکە بە درووشمی "بە یەکێتی ئێزیدیان و بە ڕۆحی چوارشەممەی سوور، خۆبەڕێوەبەری شەنگال دادەمەزرێنین" ئەنجامدرا. شوێنی چالاکییەکە بە گوڵی نیسان ڕازێنرایەوە و ئێزدییەکان بە جلوبەرگی ڕەسەنی خۆیانەوە بەشداربوون.

لە ئاهەنگەکەدا لەسەر ناوی ئیدارەی خۆبەڕێوەبەری شەنگال، نایف شەمۆ ڕایگەیاند بەهیوام هەموو ڕۆژێکمان بەم جۆرە بێت، ئەم ڕۆژە گرنگ و پیرۆزە چونکە جیهان لەم ڕۆژەدا ئافرێندراوە، گوتی: "ئەم ڕۆژە لە هەموو ئێزیدیان و جیهان پیرۆز دەکەین. ئەم ڕۆژە لە بنەماڵەی شەهیدان و شەڕڤانانی سەر چیاکان پیرۆز دەکەین و هیوای سەرکەوتنیان بۆ دەخوازین. ئەم جەژنە پیرۆزە لە سەرۆکمان پیرۆز دەکەین و سڵاو لە بەرخۆدانی ئیمراڵی دەکەین".

پاشان گرووپی چیا چەند گۆرانییەکیان پێشکەش کرد.

پاشان پەیامی ماڵی ئێزیدیانی هەرێمی جەزیرە لە باکور و ڕۆژهەڵاتی سوریا خوێنرایەوە، لە پەیامەکەدا جەژنی ئێزیدیان پیرۆزکرا و گوتراوە: "بەهیواین ئەمساڵ ببێتە ساڵی ئازادی جەستەیی ڕێبەر ئاپۆ و بەدەستهێنانی خۆبەڕێوەبەری شەنگال. ئەم جەژنە لە ئیدارەی خۆبەڕێوەبەری و تەڤگەری ئازادی ژنانی ئێزدی و هێزەکانی یەبەشە-یەژەشە پیرۆز دەکەین. هیوادارین ساڵی ئایندەش هەمووان ئازادانە جەژنەکەیان پیرۆز بکەن".

پاشان لەسەر گرنگی ڕۆژەکە شانۆیەک نمایشکرا و هەڵبەست خوێنرایەوە.

ئاهەنگەکە بە هەڵپەڕکێ بەردەوام بوو.