فڕۆکە جەنگیەکانی دەوڵەتی داگیرکەری تورک لە گوندی ڕۆبۆسکیی ناوچەی قلەبانی شڕنەخ لە ساڵی ٢٠١١ دا ٣٤ کەسیان شەهید کرد کە ١٤ کەسیان منداڵ بوون. دەبەپە، پارتی ئازادی و سەندیکای پارێزەرانی ئامەد لە ٩مین ساڵیادی کۆمەڵکوژی ڕۆبۆسکیدا یادی شەهیدانی کۆمەڵکوژیەکەیان کردەوە و راگەیەنراویان بڵاوکردەوە.

دەبەپە: پێویستە ئەنجامدەران سزا بدرێن

دەبەپە لە راگەیەنراوێکدا باسی ئەوەی کرد کە کۆمەڵکوژی شێخ سەعید، قۆچگری و دەرسیم و کوشتنەکانی ساڵەکانی ١٩٩٠ لەدژی گەلی کورد، سیاسەتی فەرمی دەوڵەت بوون و وتی، "وەک سزادانێک کۆمەڵکوژیان ئەنجامدا. ٩ ساڵ لەمەوبەریش ٣٤ گەنجی کورد بە فڕۆکە شەهید کران و دۆسیەکەیان داخرا. پێویستە ئەنجامدەرانی کۆمەڵکوژی ڕۆبۆسکی و کۆمەڵکوژیەکانی دیکە سزا بدرێن."

پارتی ئازادی: هیچ کاتێک کۆمەڵکوژی ڕۆبۆسکی لەبیرناکەین

پارتی ئازادی باسی ئەوەی کرد کە کۆمەڵکوژی ڕۆبۆسکی، شتێکی ئاسایی نەبوو و وتی، "هیچ کاتێک ڕۆبۆسکی لەبیرناکەین و ڕێگا نادەین لەبیر بکرێت. لە ٩مین ساڵیادیدا بەڕێزەوە یادی شەهیدانی ڕۆبۆسکی دەکەینەوە."

سەندیکای پارێزەرانی ئامەد: پێویستە دۆسیەکە جارێکیتر بکرێتەوە

سەندیکای پارێزەرانی ئامەدیش رایگەیاند، بەهۆی کۆمەڵکوژی ڕۆبۆسکی هیچ بەرپرسێکی دەوڵەت سزانەدراوە و وتی، "بکوژەکان لەلایەن بروکراسیەوە دەپارێزرێن و بۆیەش ڕێگا نادرێت راستیەکان ئاشکرا بکرێن. ئێمە داوا دەکەین دۆسیەی لێپرسینەوەکە جارێکیتر بکرێتەوە، بکوژ و بەرپرسیاران سزابدرێن و دەست لە سیاسەتی سزانەدان هەڵگرن."

ف.ق