کوردێکی خەڵکی شاری دێرکی رۆژئاوای کوردستان کاتێک لە دەروازەی سنوری پێشخاپورەوە دەچووە رۆژئاوا، لەلایەن ئاسایشی پەدەکەوە دەستگیرکرا. ئەو کەسە بە بیانۆی ئەوەی منداڵەکانی لەناو یەپەگەدان و پشتگیری لە بەڕێوەبەری خۆسەر دەکات دەستگیرکراوە.
ناییف عەلی حەسەن خەڵکی شاری دێرکە و لە ساڵی ١٩٦٨ لەدایک بووە، ماڵباتەکەی وتی، باوکیان ١ی نیسان سەردانی باشوری کوردستانی کردبوو و بە شێوەیەکی فەرمی لە دەروازەی سێمالکاوە سەردانی زۆربەی شارەکانی باشوری کوردستان کردبوو. هەروەها باسی ئەوەیان کرد کە ئەمڕۆ ئەو کاتەی بۆی دیاریکرابوو، کۆتایی هات و ویستی لە رێگەی پیشخابۆرەوە بچێتەوە بۆ رۆژئاوای کوردستان بەڵام دەستگیرکراوە.
بە پێی وتەی خانەوادەکەی، ناییف عەلی حەسەن لە دەروازەکە رووبەرووی لێپرسینەوە بووەتەوە و دواتر لەلایەن ئاسایشی پەدەکەوە دەستگیرکراوە و بۆ ئاسایشی دهۆک دەگوازرێتەوە.
خانەوادەکەی رایگەیاند، چارەنووسی باوکیان نادیارە و ئەوان ئاگادار نین بۆ گوێ براوە و دەست بەسەر تەلەفۆنەکەشیدا گیراوە.
ف.ق
