ئێوارەی ئەمڕۆ بۆردی دۆكیۆمێنتكردنی مێژووی هەڵەبجە، بەهاوكاری ڕێكخراوی دۆستانی هەڵەبجە، لە هۆڵی مۆنۆمێنتی شەهیدانی شارەكە، لە مەراسیمێکی تایبەتدا سروودی هەڵەبجەی یار بڵاو كرایەوە كە تایبەتە بە ئاشتیی و ئاوەدانیی و پێكەوەژیان لە شارەكەدا. سروودەكە دەبێتە ناسنامەیەكی شارەكە و لەناوەندە پەروەردەی و كۆڕو كۆبونەوەی گشتیەكانی شارەكەدا بەكاردەهێنرێت.

لە مەراسیمەکەدا ژمارەی زۆر لە خەڵکی هەڵەبجە، ڕۆشنبیران، هونەرمەندان و کەسوکاری شەهیدانی کیمیابارانی هەڵەبجە ئامادەبوون.

لە چالاکییەکەدا ئاماژە کرا بەوەی سرودەکە باسی هەموو شتێكی هەڵەبجە دەكات، هەموو هێما و سیمبولەکانی لە پێكهاتەی جافەكان، ١٣ ماڵە، شاری شاعیران و ئاشتی و پێكەوە ژیان، هەموو ئەوانە لەناو سروودەكە كۆبووەتەوە، ئامانج لەم كارە بۆ ئەوەیە  هەڵەبجەش سروودێكی تایبەت بەخۆی هەبێت، بەجۆرێك بێت بچێتە ناو سیستەمی پەروەردەوە، هەمومان لە یاد و كۆبوونەوەكاندا بیڵێنەوە.