دەستپێشخەری سوریا بۆ ئازادی ڕێبەر عەبدوڵا ئۆجالان-کانتۆنی منبج و کۆمەڵەی ژنانی منبج بۆ ئیدانەکردنی سیستمی قڕکەر و ئەشکەنجەی دەوڵەتی تورک لە دژی ڕێبەری گەلی کورد عەبدوڵا ئۆجالان ڕێپێوانێکی جەماوەرییان بەڕێوە برد.

بەسەدان کەس لە هاووڵاتیانی شارەکە و دەوروبەر کە پێکهاتبوون لە ئەندامانی ڕێکخراوەکانی کۆمەڵگەی مەدەنی، سەربازی و پارتە سیاسییەکان و هەروەها شێخ و گەورەی هۆزەکان و ئەندامانی ڕێکخراوەکانی کۆمەڵگەی مەدەنی، کۆمین، ئەنجوومەنەکان و شەڕڤانانی برینداری شەر و کەسوکاری شەهیدان بەشداری ڕێپێوانەکە بوون.

ڕێپێوانکەران وێنەکانی ڕێبەری گەلی کورد عەبدوڵا ئۆجالان و پانکارتی داوای ئازادی جەستەیی بۆ عەبدوڵا ئۆجالان یان بەرز کردەوە و بەردەوام دروشمی "بێ سەرۆک ژیان نابێ" و " بڕووخێ فاشیزمی تورک" یان دەوتەوە.

لە چالاکییەکەدا ئەندامی فیدراسیۆنی بریندارانی شەڕ گیڤارا ئەلزان سیستەمی ئەشکەنجە و قڕکەری ئیمرالی ئیدانە کرد و وتی: "تورکیا بەرەنگاریی پڕۆژە دیموکراتیکەکان دەبێتەوە، بەتایبەتی ڕێگری لە پڕۆژەی نەتەوەی دیموکراتیک کە لەلایەن ڕێبەر عەبدوڵا ئۆجالانەوە پێشکەش کراوە دەکات. بە هێرشە دڕندەکانی بۆ سەر هەرێمەکانی باکور و ڕۆژهەڵاتی سوریا و بەئامانج گرتنی ژێرخانی ناوچەکە دەیەوێت پڕۆژەکەمان لەناو ببات و گەل لە بیرۆکەکانی سەرۆک ئاپۆ دوور بخاتەوە بەڵام ئەو کەسانەی گرێدراوی بیرۆکە و فەلسەفەی سەرۆک ئاپۆن، تا بەدیهێنانی ئازادیی جەستەیی بەرێزیان درێژە بە تێکۆشانیان دەدەن.

هەروەها سەنا ڕەجەب، ئەندامی دەستپێشخەریی سوریا بۆ ئازادی ڕێبەر عەبدوڵا ئۆجالان ڕایگەیاند، ئەوان شوێنکەوتووی فەلسەفەی ڕێبەر عەبدوڵا ئۆجالانن و وتی: "تا بەدی هێنانی ئازادی فیزیکی ڕێبەر عەبدوڵا ئۆجالان و ئازادیی هەموو گەلانی جیهان، درێژە بە ڕێگای تێکۆشان و شۆڕش دەدەین."

چالاکییەکە بە دروشمی "بژی ڕێبەر عەبدوڵا ئۆجالان" و  "بێ سەرۆک  ژیان نابێ" کۆتایی هات.