لە باکور و رۆژهەڵاتی سوریا هەموو ساڵێک پیرۆزبایی جەژن بە سەردانکردنی گۆڕستانی شەهیدان دەستپێدەکات.

دوای نوێژی جەژنی قوربان بنەماڵەی شەهیدان، ئەندامانی رێکخراوە مەدەنیەکان، دامودەزگاکانی خۆبەڕێوەبەری دیموکراتیک، ئاسایش، فەرماندە و شەڕڤانانی قەسەدە، یەپەژە و یەپەگەس لەناویاندا بە هەزاران کەس سەردانی گۆڕشتانی شەهیدانیان کرد.

دانیشتوانی ناوچە جیاجیاکان وێنەی رۆڵە شەهیدەکانیان هەڵگرت و گوڵیان لەسەر گۆڕی شەهیدان دانا، قورئانیان خوێند و نزایان کرد و شیرینیان دابەش کرد.

لە سەردانەکاندا بەڕێوەبەرانی ئەنجومەنەکانی بنەماڵەی شەهیدان و رێکخراوە مەدەنیەکان قسەیان کرد و لە وتەکانیاندا یادی شەهیدانی ئازادییان بەرزڕاگرت. وترا کە ئاسایشی هەرێمەکە بەرهەمی رەنجی شەهیدانە. هەروەها ئاماژە بە یەکڕیزی پێکهاتەکانی هەرێمەکە درا، کە بە دەوری رێکخراوە و دامەزراوە مەدەنی و سەربازییەکانی خۆیانەوە کۆبوونەوە.

لە وتەکاندا بەڵێنی درێژەدان بە رێبازی شەهیدان و پاراستنی میراتی ئەو شەهیدانە دوپات کرایەوە.

هـ . ب