زاگرۆس کۆبانێ (مستەفا ئەحمەد یوسف) شەڕڤانی هێزەکانی کۆماندۆ لە ١٨ی ئاداردا لە کاتی جێبەجێ کردنی ئەرکدا لە دێرەزۆر شەهید بوو، بە شێوەیەکی جەماوەری لەلایان ئەندامانی دامودەزگا و ڕێکخراوەکانی خۆبەڕێوەبەری کانتۆنی فوراتەوە، بەخاکسپێردرا.

دوای خولەکێک ڕێزگرتن بۆ یادی شەهیدانی ڕێگای ئازادی، هاوسەرۆکی بزووتنەوەی کۆمەڵگای دیموکراتیکی کانتۆنی فورات، هەدلە حەسەن، قسەی کرد و وتی: "شەهید زاگرۆس باوکی دوو منداڵ بوو، تا دوا ساتەکانی ژیانی بەبێ دوودڵی تێکۆشانی کرد و بەرەنگاری دوژمن بووەوە. هەروەها لە دژی داگیرکاری بە هەڵوێست بوو، شەهید زاگرۆس بۆ پاراستنی خاکەکەی ژیانی خۆی بەخت کرد."

پاشان ناسنامەی شەهید لەلایەن مەجلیسی بنەماڵەی شەهیدانەوە خوێندرایەوە و ڕادەستی بنەماڵەکەی کرا.

مەراسیمەکە بە دروشمی "شەهید نامرن" کۆتایی هات.