ڕێکخراوی چاودێریی مافەکانی مرۆڤ لە سووریا (SOHR) ڕایگه‌یاند، له ناوچه‌ی ئیدلب هێرش كراوه‌ته سه‌ر ئه‌و شوێنانه‌ی هێزه‌كانی سه‌ر به ڕژێمی سووریای لێ جێگیرن، به‌و هۆیه‌وه لانی كه‌م ٢٠ چه‌كداری ڕژێم كوژراون.
چه‌ته‌كانی گرووپی هه‌یئه‌ی ته‌حریری شام كه له لایه‌ن ڕژێمی توركیا پشتگیرییان ده‌كرێت، هێرشیان كرده سه‌ر ناوچه‌كانی ژێر كۆنتڕۆڵی ڕژێمی سووریا له ناوچه‌ی ئیدلب.
له‌نێوان ئه‌و هێزانه‌دا شه‌ڕ هاته ئاراوه و ده‌گوترێت ئه‌مه سه‌ختترین شه‌ڕه له ناوچه‌كه دوای ڕاگه‌یاندنی ئیدلب وه‌ك «ناوچه‌ی بێ چه‌ك» له لایه‌ن توركیا و ڕووسیا كه مانگی ئه‌یلوولی ٢٠١٨ ڕێككه‌وتنێكیان ئیمزا كرد و ئیدلب-یان وه‌ك «ناوچه‌ی داماڵدراو له چه‌ك» ڕاگه‌یاند.
ڕێکخراوی چاودێریی مافەکانی مرۆڤ لە سووریا ڕایگه‌یاند، ڕۆژی دووشه‌ممه له ئه‌نجامی هێرشی گرووپی هه‌یئه‌ی ته‌حریری شام ٥ كه‌س كوژراون و تا ئێستاش ژماره‌ی كوژراوانی ڕژێمی سووریا گه‌یشتووه‌ته ٢٠ چه‌كدار.
هه‌روه‌ها ڕێكخراوه‌كه ئاماژه‌ی بۆ ئه‌وه كردووه، له ئه‌نجامی شه‌ڕ و بۆمبارانی ڕژێمدا ٩ چه‌ته‌ی هه‌یئه‌ی ته‌حریری شام كوژراون. دوای ئه‌و پێكدادانانه هه‌زاران كه‌سی سیڤیل له ناوچه‌ی خان شێخمووس چوونه‌ته ده‌ره‌وه و په‌نایان بۆ ناوچه‌كانی باكووری شاره‌كه بردووه.
s.m
